احمد اویس کو بطور ایڈوکیٹ جنرل کام جاری رکھنے کی اجازت

لاہور: لاہور ہائیکورٹ نے احمد اویس کو بطور ایڈووکیٹ جنرل پنجاب کام جاری رکھنے کی اجازت دیدی۔

تفصیلات کے مطابق چیف جسٹس لاہور ہائیکورٹ جسٹس امیر بھٹی نے ایڈووکیٹ جنرل پنجاب احمد اویس کو کام سے روکنے کے خلاف درخواست پر سماعت کی۔ عدالت نے احمد اویس کو بطور ایڈووکیٹ جنرل پنجاب کام جاری رکھنے کی اجازت دیتے ہوئے ہدایت کی کہ حکومت لکھ کر دے کہ احمد اویس کو کام سے نہیں روکے گی۔

سماعت کے دوران ایڈیشنل ایڈووکیٹ جنرل جواد یعقوب عدالت میں پیش ہوئے اور موقف اختیار کیا کہ میں عدالت کے سامنے تسلیم کرتا ہوں احمد اویس آج بھی ایڈووکیٹ جنرل پنجاب ہیں۔

یہ بھی پڑھیں: اسلامی نظریاتی کونسل کا 2 روزہ اجلاس، 39 موضوعات پر سفارشات تیار

چیف جسٹس امیر بھٹی نے ریمارکس دیے کہ آپ ایڈووکیٹ جنرل کو کہہ سکتے ہیں کہ وہ آپ کے کیس میں پیش نہ ہوں، لیکن انہیں کام سے نہیں روک سکتے، کل لارجر بینچ کے روبرو احمد اویس بطور ایڈووکیٹ جنرل پنجاب معاونت کے لیے پیش ہوئے، عدالت نے اس کیس میں بطور معاون طلب کیا، اس سسٹم کو اچھا بنائیں چلنے دیں ، کل کو آپ کو بھی اس کا سامنا کرنا پڑے گا، جس جگہ آپ آتے ہیں تو اس جگہ سے جانا بھی ہوتا ہے، میں نے کبھی یہ تنازعے نہیں دیکھے اب شروع ہوچکے ہیں۔

بعدازاں عدالت نے کیس کی سماعت ملتوی کرتے ہوئے چیف سیکرٹری سمیت دیگر سے تحریری جواب طلب کرلیا۔