گوگل نیوز پر ہمیں فالو کریںلیسٹر، برطانیہ کے مشہور گلوکار اور کمیونٹی ورکر، دلجیت نیر کو ویسٹ برومویچ میں “لائف ٹائم اچیومنٹ ایوارڈ” سے نوازا گیا۔ یہ ایوارڈ ان کی 40 سالہ شاندار خدمات کے اعتراف میں دیا گیا، جو انہوں نے فن اور کمیونٹی کے لیے انجام دی ہیں۔
معروف صحافی جاوید عنایت کے مطابق، کلچر یونائیٹڈ کے زیرِ اہتمام ویسٹ برومویچ میں بھنگڑا ایوارڈ 2024 کا انعقاد کیا گیا، جس میں دلجیت نیر کو ان کے شاندار کارناموں پر یہ اعزاز پیش کیا گیا۔
دلجیت نیر نے 1983 میں اپنے فنی سفر کا آغاز کیا۔ ان کا اندازِ گائیکی، جو روایت اور جدت کا حسین امتزاج پیش کرتا ہے، نے انہیں جلد ہی برطانیہ کی بھارتی اور پاکستانی کمیونٹی میں مقبول بنا دیا۔ ان کے اسٹیج شوز تفریح کے ساتھ ساتھ ثقافتی یکجہتی اور ہم آہنگی کو فروغ دینے کا ذریعہ بنے۔
دلجیت نیر نے بی بی سی، ایوا ایف ایم، اور کوہ نور ایف ایم جیسے معتبر پلیٹ فارمز پر اپنی صلاحیتوں کا مظاہرہ کیا۔ ان کے ذریعے انہوں نے نہ صرف کمیونٹی کے مسائل کو اجاگر کیا بلکہ ثقافتی تقریبات کو بھی فروغ دیا۔ ان کے منفرد اندازِ گفتگو اور موسیقی کے ذریعے پیغام رسانی نے انہیں سامعین کے دلوں میں ایک خاص مقام دیا۔
کالا شا کالا پر بزرگ جوڑے کے ڈانس نے سوشل میڈیا پر دھوم مچادی، وائرل ویڈیو
موسیقی کے علاوہ، دلجیت نیر کمیونٹی کی ترقی اور خیراتی سرگرمیوں میں بھی سرگرم رہے ہیں۔ انہوں نے نوجوانوں کو اپنی ثقافت سے جوڑنے، بین الثقافتی ہم آہنگی کے فروغ، اور مختلف خیراتی تقریبات میں شرکت کے ذریعے اپنی کمیونٹی کی بہتری کے لیے کام کیا۔
لائف ٹائم اچیومنٹ ایوارڈ ان افراد کو دیا جاتا ہے جو اپنی زندگی میں نمایاں خدمات انجام دیتے ہیں اور دوسروں کے لیے مشعلِ راہ بنتے ہیں۔ دلجیت نیر کا یہ ایوارڈ ان کی محنت، لگن، اور بے لوث خدمات کا عالمی اعتراف ہے۔
دلجیت نیر کا کہنا ہے کہ یہ ایوارڈ ان کے لیے نیا حوصلہ ہے، اور وہ اپنی خدمات کو مزید وسیع کرنا چاہتے ہیں۔ ان کا ارادہ ہے کہ وہ نوجوان نسل کو موسیقی اور ثقافتی سرگرمیوں میں شامل کریں تاکہ اپنی روایات کو زندہ رکھا جا سکے۔
دلجیت نیر کی زندگی کا سفر اس بات کی مثال ہے کہ محنت، لگن، اور جذبہ کسی بھی فرد کو کامیابی کی بلندیوں تک لے جا سکتا ہے۔ ان کی شخصیت ایک گلوکار، اسٹیج آرٹسٹ، اور رہنما کی حیثیت سے اپنی کمیونٹی کے لیے باعثِ فخر ہے۔
ایوارڈ کی تقریب میں دلجیت نیر نے ووٹ دینے والوں اور خاص طور پر بوبی بولا کا شکریہ ادا کیا، جنہوں نے انہیں یہ اعزاز دلوانے اور پلیٹ فارم فراہم کرنے میں اہم کردار ادا کیا۔ اس ایونٹ کے ذریعے ایشیائی کمیونٹی کو نہ صرف قریب آنے کا موقع ملا بلکہ اپنے کلچر کو فروغ دینے کا بھی موقع ملا ہے۔
