روس یوکرین کیخلاف جنگ آخر تک جاری رکھے گا، سرگئی لاوروف

ماسکو: روسی وزیر خارجہ سرگئی لاوروف نے کہا ہے کہ انہیں یقین ہے کہ کچھ غیر ملکی رہنما روس کے خلاف جنگ کی تیاری کر رہے ہیں تاہم ماسکو یوکرین میں اپنی فوجی کارروائی کو آخر تک جاری رکھے گا۔

سرکاری ٹیلی ویژن کے ساتھ ایک انٹرویو میں سرگئی لاوروف نے کہا کہ روس کاجوہری جنگ کا کوئی ارادہ نہیں ہے۔ انہوں نے کہا کہ انہیں اس بات میں کوئی شک نہیں کہ یوکرین کے بحران کا حل تلاش کر لیا جائے گا اور یوکرین اور روسی حکام کے درمیان بات چیت کا نیا دور شروع ہونے والا ہے۔

مزید پڑھیں:روس کی گولہ باری، یوکرین میں ایٹمی پاورپلانٹ میں آگ لگ گئی، بڑی تباہی کا خدشہ

ان کا کہنا ہے کہ مغرب کے ساتھ روس کی بات چیت باہمی احترام پر مبنی ہونی چاہیے، نیٹو پر بالادستی برقرار رکھنے کی کوشش کرنے کا الزام لگاتے ہوئے انہوں نے کہا کہ ماسکو یوکرین کو ایسا انفرا اسٹرکچر رکھنے نہیں دے گا جس سے روس کو خطرہ ہو۔

ماسکو اس بات کو بھی برداشت نہیں کر سکتا کہ یوکرین کی طرف سے اس کیلئے کوئی فوجی خطرہ پیدا ہو، اس لئے روس یوکرین کے حوالے سے حق پر ہے۔