گوگل نیوز پر ہمیں فالو کریںپی ٹی آئی کی احتساب کمیٹی نے محکمہ سوشل ویلفیئر اور صحت کے حوالے سے شکایات پر صوبائی وزرا کو وارننگ جاری کردی اور اپنے محکمے کے حوالے سے شکایات دور کرنے کی ہدایت کردی ہے۔
پی ٹی آئی رہنماؤں نے بتایا کہ احتساب کمیٹی نے محکمہ سوشل ویلفیئر اور صحت کے حوالے سے شکایات پر وزیر سوشل ویلفیئر سید قاسم علی شاہ اور مشیر صحت احتشام علی کو طلب کیا۔
نجی چینل ایکسپریس نے ذرائع کے حوالے سے رپورٹ کیا ہے کہ احتساب کمیٹی کے ارکان قاضی انور، شاہ فرمان اور مشیر اینٹی کرپشن مصدق ملک نے وزیر سوشل ویلفیئر اور مشیر صحت کو ان کے محکموں کے حوالے سے موصول ہونے والی شکایات کے بارے میں آگاہ کیا۔
ان کا کہنا تھا کہ احتساب کمیٹی نے کابینہ کے دونوں ارکان سے تحریری طور پر وضاحت طلب کرلی۔ پی ٹی آئی احتساب کمیٹی کے رکن قاضی انور نے ایکسپریس کو بتایا کہ کمیٹی کو شکایات موصول ہوئی تھیں جس پر وزیر سوشل ویلفیئر اور مشیر صحت احتشام علی کو طلب کیا گیا۔
ان کا کہنا تھا کہ صوبائی وزیر اور مشیر کو شکایات کے حوالے سے بتایا گیا اور ہدایت کی گئی کہ وہ محکمے میں بہتری لائیں، عوام کو درپیش مشکلات حل کیے جائیں اور جو شکایات آئی ہیں انہیں دور کیا جائے۔
