آج قوم کیلئے یومِ نجات ہے، احتجاج پارلیمانی حدود میں ہونا چاہئے۔سعد رفیق

اسلام آباد: سابق وزیرِ ریلوے اور ن لیگ کے سینئر مرکزی رہنما خواجہ سعد رفیق نے کہا ہے کہ آج قوم کیلئے یومِ نجات ہے جبکہ احتجاج سب کا حق ہے تاہم یہ پارلیمانی حدود میں ہونا چاہئے۔

تفصیلات کے مطابق وزیر اعظم کے خلاف تحریکِ عدم اعتماد کے تناظر میں اپنے ایک بیان میں خواجہ سعد رفیق نے کہا کہ پی ٹی آئی نے اپنے کارکنان کو اسلام آباد آمد کی کال دی ہے جبکہ عمران خان کا چورن اب مزید بکنے والا نہیں۔ 

یہ بھی پڑھیں:

وزیراعظم کو جان سے مارنے کی سازش کا مجھے علم نہیں،فروغ نسیم

بیان میں سابق وزیرِ ریلوے خواجہ سعد رفیق نے کہا کہ عمران خان کے کئی ساتھیوں نے ان کا ساتھ چھوڑ دیا ہے۔ وزیر اعظم نے نام نہاد امریکا کا بیانیہ اپنایا ہے۔ آج کا دن بہت اہم ہے۔ احتجاج کرنا سب کا حق ہے تاہم اسے پارلیمانی حدود میں رکھنا ہوگا۔

ن لیگی رہنما خواجہ سعد رفیق نے کہا کہ ریاست کی سالمیت کو داؤ پر نہ لگایا جائے۔ عمران خان ناکام سربراہ کے طور پر سامنے آئے۔ تحریکِ انصاف کے کارکن اور اراکینِ اسمبلی اپنی سوچ کے مطابق فیصلہ کریں۔ ہمارا کوئی کارکن سڑکوں پر نہیں ہوگا۔

تحریکِ عدم اعتماد کے متعلق خواجہ سعد رفیق نے کہا کہ یہ خالصتاً جمہوری عمل ہے جو ہونے والا ہے۔ انتظامیہ سے رابطے میں ہیں اور اب تک کے معاملات ٹھیک لگ رہے ہیں۔ آج پاکستان کیلئے یومِ نجات ہوگا۔ 22 کروڑ عوام کو نحوست سے نجات ملے گی۔

وزیر اعظم پر تنقید کرتے ہوئے سابق وفاقی وزیر خواجہ سعد رفیق نے کہا کہ انہیں صرف لوگوں پر الزام لگانے آتے ہیں۔ عمران خان کو پارلیمانی روایات کا کوئی ادراک نہیں جبکہ پاکستان کی ریاست سب سے زیادہ اہم ہے۔