انسانی حقوق کے عالمی دن کے موقع پر مقبوضہ کشمیرمیں مکمل ہڑتال کی گئی

سرینگر: کنٹرول لائن کے دونوں اطراف اور دنیا بھر میں مقیم کشمیریوں نے منگل کو انسانی حقوق کے عالمی دن کو یوم سیاہ کے طورپرمنایا جس کامقصد عالمی برادری کویاددلانا تھا کہ بھارتی قابض انتظامیہ مقبوضہ کشمیر میں عوام کے تمام بنیادی انسانی حقو ق کوپامال کر رہی ہے۔

کشمیرمیڈیاسروس کے مطابق کل جماعتی حریت کانفرنس کے چیئرمین سید علی گیلانی کی اپیل پر مقبوضہ علاقے میں مکمل ہڑتال کی گئی۔ بھارت مخالف مظاہروں کو روکنے کیلئے پورے مقبوضہ علاقے میں بڑی تعداد میں بھارتی فوجیوں کو تعینات کیاگیا تھا ۔

حریت رہنمائوں اورتنظیموں نے اپنے الگ الگ بیانات میں اقوام متحدہ اور انسانی حقوق کے عالمی اداروں سے اپیل کی ہے کہ وہ مقبوضہ کشمیرمیں انسانی حقوق کی سنگین پامالیوںکا جائزہ لینے کیلئے اپنی ٹیمیں جموںوکشمیر بھیجیں۔

بھارتی پولیس نے انسانی حقوق کے عالمی دن کے موقع پر سکھ برادری کی نمائندہ تنظیموں دل خالصہ ، شرومنی اکالی دل اور سکھ سٹوڈنٹس تنظیم کے سرینگر کی طرف مارچ کو روکنے کیلئے مارچ کے شرکاء کو لکھن پورہ جموں ہائی وے پر طاقت کے وحشیانہ استعمال کا نشانہ بنایا ۔

مزید پڑھیں: بھارتی فوجی محاصرے سے مقبوضہ کشمیر میں مذہبی آزادی بری طرح متاثر ہوئی ہے، نیویارک ٹائمز

کشمیر میڈیا سروس کے ریسرچ سیکشن کی جانب سے منگل کو انسانی حقوق کے عالمی دن کے موقع پر جاری ہونے والی رپورٹ میں کہاگیا ہے کہ بھارتی فوجیوں نے جنوری 1989سے اب تک اپنی ریاستی دہشت گردی کی جاری کارروائیوں کے دوران 95ہزار471بے گناہ کشمیریوں کو شہید کیا ہے جن میں سے 7ہزار135کو دوران حراست شہیدکیا گیا ۔

ان واقعات سے 22ہزار910خواتین بیوہ اورایک لاکھ 7ہزار780بچے یتیم ہوگئے۔رپورٹ کے مطابق اس عرصے کے دوران فوجیوں نے 11ہزار175خواتین کی بے حرمتی کی جبکہ ایک لاکھ9 ہزار451 مکانوں اور دیگر املاک کو تباہ کیا۔

اس دوران بھارتی فوجیوں اور پولیس اہلکاروں نے کم سے کم 8ہزار کشمیریوں کو حراست کے دوران لاپتہ کیا۔بھارتی فوجیوں کی طرف سے مظاہرین پر پیلٹ گنز کے بے دریغ استعمال کی وجہ سے ہزاروں لڑکے اور لڑکیاں زخمی جبکہ درجنوں بینائی سے محروم ہوگئے ہیں۔

رپورٹ میں کہاگیا ہے کہ 5اگست کو جب بھارت نے جموں وکشمیر کی خصوصی حیثیت کوختم کردیا تھا کے بعد سے بھارتی فوجیوں نے دو خواتین اور تین لڑکوں سمیت 38کشمیریوںکو شہید کیا ہے جن میں سے سات کو جعلی مقابلوںمیں شہید کیاگیا۔

ادھر جموں میں ا سکولوں اورکالجوں کے طلباء، فنکاروں، اداکاروں ، گلوکاروں، بلاگرز اورسوشل میڈیاکے کارکنوں کی بڑی تعداد نے مقبوضہ علاقے میں انٹرنیٹ کی مسلسل معطلی کے خلاف احتجاجی مظاہرہ کیا۔ کل جماعتی حریت کانفرنس کی آزادکشمیر شاخ نے منگل کو اسلام آباد میں ایک احتجاجی مظاہرہ کیا۔

انسانی حقوق کے عالمی دن کے موقع پراقوام متحدہ کے سیکرٹری جنرل کے نام ایک یادداشت عالمی ادارے کے دفتر میں جمع کرائی گئی جس میں ان پر تنازعہ کشمیر کے حل میں کردار ادا کرنے پر زوردیا گیاہے۔