کراچی میں پیر سے ریکارڈ توڑ سردی پڑے گی، محکمہ موسمیات نے خبردار کردیا

کراچی: محکمہ موسمیات کی جانب سے خبردار کیا گیا ہے کہ 28 دسمبر سے شہر قائد میں سردی کی نئی لہر آ سکتی ہے،جس کے باعث درجہ حرارت میں کمی سے 7 سالہ ریکارڈ ٹوٹ سکتا ہے۔

ترجمان محکمہ موسمیات خالد ملک کا کہنا ہے کہ 26 دسمبر سے ملک میں مغربی ہواؤں کا ایک نیا سلسلہ داخل ہوسکتا ہے جو بعد ازاں ملک کے شمالی علاقوں اور شمالی پنجاب کو متاثر کرسکتا ہے۔

ترجمان نے مزید کہا کہ مغربی ڈسٹربنس کے باعث کراچی میں 28 دسمبر سے موسم سرد رہنے کا امکان ہے اور اس دوران غیر معمولی سائبیرین ہوائیں چل سکتی ہیں۔

سابقہ مغربی سلسلے کی وجہ سے شہر کا کم سے کم پارہ سنگل ہند سے میں 8 ڈگری ریکارڈ ہوچکا ہے جب کہ نئے سلسلے کے تحت بھی کم از کم درجہ حرارت کمی سے سنگل ہند سے تک گرسکتا ہے۔

انہوں نے واضح کیا کہ اب تک کا کم ترین درجہ حرارت 2013 میں 6 ڈگری ریکارڈ کیا گیا ہے، سردی کی نئی لہر کے دوران یہ 7 سالہ ریکارڈ ٹوٹ سکتا ہے۔

محکمہ موسمیات کا کہنا ہے کہ سردی کی نئی لہر 4 روز تک برقرار رہ سکتی ہے جب کہ اس دوران سمندری ہوائیں منقطع اور بلوچستان کی شمال مشرقی ہواؤں کا اثر شہر پر نمایاں رہے گا۔