کراچی، جیل چورنگی کے ڈپارٹمنٹل اسٹور میں لگی آگ پر تاحال قابو نہیں پایا جاسکا

راجا طارق چانڈیو نے ایک انٹرویو میں کہا کہ کسی کو بھی فائر بریگیڈ کے عملے پر یقین نہیں آیا کیونکہ آگ مسلسل بھڑک رہی ہے۔ انہوں نے کہا کہ بنیادی مسئلہ یہ ہے کہ گاڑیوں کی پارکنگ کے لیے بنایا گیا زیر زمین تہہ خانے کو اسٹور کے مالکان کھانے پینے اور دیگر اشیا کو ذخیرہ کرنے کے لیے استعمال کرتے تھے۔

ڈپٹی کمشنر شرقی نے کہا کہ انہیں اطلاعات موصول ہوئی ہیں کہ دکانوں کے اہلکاروں نے قیمتوں میں اضافے کے پیش نظر کوکنگ آئل کی بڑی مقدار جمع کر رکھی ہے جو آگ کے لیے ایندھن کا کام کررہے ہیں۔

اہلکار کا مزید کہنا تھا کہ آگ جمعہ کی دوپہر کو ایک بار پھر آگ بھڑک اٹھی تھی اور پارکنگ کے لیے مختص دوسری منزل تک جا پہنچی جس سے کئی موٹر سائیکلوں کو نقصان پہنچا۔

راجا طارق چانڈیو نے یہ بھی کہا کہ کوکنگ آئل کی بڑی مقدار کی موجودگی کے علاوہ تہہ خانے تک رسائی نہ ہونے کی وجہ سے بھی فائربریگیڈ کے عملے کو مشکلات کا سامنا کرنا پڑ رہا ہے، اب تک عملہ تہہ خانے سے نکلنے والے دھوئیں پر قابو پانے کی کوشش کر رہا ہے۔

ان کا کہنا تھا کہ ہم نے دیواروں کو گرادیا ہے اور تہہ خانے کے اندر پانی ڈالنے کے لیے کم از کم 14 سوراخ کیے گئے ہیں تاکہ آگ کو پھیلنے سے روکا جا سکے، اس مقصد کے لیے کیمیکل بھی استعمال کیے گئے ہیں۔

انہوں نے انکشاف کیا کہ تہہ خانے میں 0.8 ملین گیلن پانی ڈالا گیا ہے، تہہ خانے میں ڈالا گیا پانی ابتدائی طور پر سڑکوں پر نکالا جا رہا تھا جس سے گاڑیوں کی آمدورفت میں مشکلات پیدا ہو رہی تھیں، اس لیے اب تہہ خانے کے اندر جمع ہونے والے پانی کو سیوریج لائنوں/ نالوں میں نکالنے کی کوشش کی گئی ہے۔

ڈپٹی کمشنر کا کہنا تھا کہ ڈپارٹمنٹل اسٹور کے مالکان کے خلاف مقدمہ درج کر لیا گیا ہے لیکن اعتراف کیا کہ ابھی تک کسی مشتبہ شخص کو گرفتار نہیں کیا گیا ہے۔

انہوں نے مزید کہا کہ آگ پر مکمل طور پر قابو پانے کے بعد سندھ بلڈنگ کنٹرول اتھارٹی سے کہا جائے گا کہ وہ ایک معائنہ کرے اور عمارت کے ڈھانچے کو پہنچنے والے نقصان کا اندازہ لگائے تاکہ یہ معلوم کیا جا سکے کہ آیا یہ رہنے کے قابل ہے یا نہیں۔