گوگل نیوز پر ہمیں فالو کریںکراچی میں کورونا وائرس سے متاثرہ پولیس افسران اور جوانوں کی تعداد میں اضافہ جاری ہے، اب تک 3 ہزار 652 افسران اور اہلکار کورونا کا شکار ہو گئے۔
تفصیلات کے مطابق گزشتہ 24 گھنٹوں کے دوران پولیس افسران اور جوانوں کے کورونا کے 420 ٹیسٹ کیے گئے جن میں سے 4 کا نتیجہ مثبت نکلا۔
مجموعی طور پر کراچی پولیس کے 3 ہزار 652 افسران اور جوان کورونا کا شکار ہیں۔ کورونا کے خلاف فرائض کی ادائیگی کے دوران 20 پولیس افسران شہید بھی ہوئے۔
اب تک 3 ہزار 475 افسران اور جوان کورونا وائرس سے صحتیاب ہوئے ہیں۔ زیرِ علاج افسران اور جوانوں کی تعداد 157 ہے۔ پولیس کا کہنا ہے کہ متاثرہ اہلکاروں کی صحت کا مکمل خیال رکھا جارہا ہے۔
یاد رہے کہ اِس سے قبل پاکستان میں کورونا وائرس کے 2 ہزار 829 نئے کیسز رپورٹ ہوئے جبکہ گزشتہ 24 گھنٹوں کے دوران 43 مزید شہری جان کی بازی ہار گئے۔
سرکاری اعدادوشمار کے مطابق کورونا وائرس سے مجموعی طور پر 3 لاکھ 95 ہزار 185 افراد متاثر جبکہ 7 ہزار 985 افراد جاں بحق ہوئے۔
مزید پڑھیں: کورونا کے 2 ہزار 829 نئے کیسز رپورٹ، 43 مزید شہری جاں بحق
