بیوی کا پسندیدہ جوتا ٹوٹنے پر شوہر نے دکاندار کیخلاف مقدمہ کردیا

کراچی : شہر قائد میں کنزیومر کورٹ میں ایک انوکھا کیس آگیا جس میں شوہر نے اپنی بیوی کا پسندیدہ جوتا ٹوٹنے پر دکاندار کیخلاف مقدمہ دائر کردیا ہے۔

شہری کا کہنا ہے کہ میری اہلیہ نے 16 سو روپے کا جوتا خریدا جو کچھ دن بعد دو ٹکڑے ہوگیا اور اس کی وجہ سے میری اہلیہ کو شدید دکھ ہوا کیونکہ یہ میری اہلیہ کا پسندیدہ جوتا تھا۔

شہری کا کہنا ہے کہ دکاندار سے شکایت کی تو وہ مسئلہ حل کرنے کو تیار نہیں ہے، درخواست گزار نے مطالبہ کیا ہے کہ ناقص جوتے فروخت کرنے پر دکاندار کیخلاف کارروائی کی جائے اور بھاری جرمانہ عائد کیا جائے۔

کراچی شرقی کی کنزیومر کورٹ نے شہری کی درخواست قبول کرتے ہوئے دکاندار کو اگلی پیشی پر عدالت طلب کیاہے۔

واضح رہے کہ اکثر دکاندار جھوٹی تعریفوں کے پل باندھ کر ناقص اشیاء مہنگے داموں فروخت توکردیتے ہیں تاہم ان اشیاء کی خرابی پر شکایت کرنیوالوں کیساتھ انتہائی نامناسب رویہ اختیارکیا جاتا ہے۔

کچھ ہفتوں قبل کراچی کی موبائل مارکیٹ میں فون کی مرمت کیلئے آنیوالے شہری کو شکایت کرنے پر دکانداروں نے ملکر شدید تشدد کا نشانہ بھی بنایا تھا جس سے شہری کے کولہے کی ہڈی بھی ٹوٹ گئی تھی۔