بلوچستان بلدیاتی انتخابات، جے یو آئی سب سے زیادہ نشستیں جیتنے میں کامیاب

کوئٹہ: بلوچستان بلدیاتی انتخابات کے غیر حتمی و غیر سرکاری نتائج کے تحت آزاد امیدواروں نے میدان مار لیا جبکہ جمعیت علمائے اسلام دیگر سیاسی جماعتوں کے مقابلے میں سب سے زیادہ نشستیں جیتنے میں کامیاب ہوگئی ہے۔

تفصیلات کے مطابق بلوچستان میں گزشتہ روز منعقد کیے گئے 32 اضلاع کے بلدیاتی انتخابات میں آزاد امیدواروں نے 1349 نشستیں حاصل کی ہیں۔ سیاسی جماعتوں میں جمعیت علمائے اسلام (ف) 232 نشستوں کے ساتھ سب سے آگے ہے۔

یہ بھی پڑھیں:

اس بار تیاری سے نکلیں گے، کوئی روک نہیں سکے گا: عمران خان

بلدیاتی انتخابات کے غیر حتمی و غیر سرکاری نتائج کے مطابق حکمراں بلوچستان عوامی پارٹی 160 نشستیں حاصل کرکے دوسرے نمبر پر رہی۔ پشتونخوا ملی عوامی پارٹی 94 نشستوں کے ساتھ تیسری بڑی سیاسی پارٹی بننے میں کامیاب ہوگئی۔

نیشنل پارٹی 67 نشستوں کے ساتھ چوتھی پوزیشن پر جبکہ بی این پی مینگل 65 نشستیں جیتنے کے بعد پانچویں نمبر پر موجود ہے۔ پیپلز پارٹی نے 49نشستیں اپنے نام کرکے چھٹی جبکہ بی این پی عوامی نے 40 نشستیں جیت کر ساتویں پوزیشن پر قبضہ جما لیا۔

انتخابات میں حصہ لینے والی دیگر سیاسی جماعتوں میں سے پی ٹی آئی نے 22، اے این پی نے 19، جمہوری وطن پارٹی نے 17جبکہ مسلم لیگ (ن) نے 15 نشستیں جیتیں۔ واضح رہے کہ کل صبح 8 بجے سے شام 9 بجے تک پولنگ بلا تعطل جاری رہی۔