جے یو آئی نے حافظ حمد اللہ پر حملے کیخلاف کوئٹہ میں شٹر ڈاؤن ہڑتال کا اعلان کردیا

مستونگ: جمعیت علماء اسلام (جے یو آئی) ایف کے مرکزی رہنما عبدالغفور حیدری نے کہا ہے کہ حکومت اور انتظامیہ کو چوکس رہنے کی ضرورت ہے، مستونگ واقعہ انتہائی افسوسناک ہے، مستونگ دھماکے کے خلاف کوئٹہ میں جمعہ کو شٹر ڈاؤن ہڑتال ہوگی۔

مستونگ میں میڈیا سے گفتگو کرتے ہوئے غفور حیدری نے کہا کہ مستونگ میں دہشتگردوں نے ٹارگٹ کیا تاہم کوئی شدید زخمی نہیں ہوا۔

انھوں نے کہا کہ بلوچستان میں امن وامان کی صورتحال بہتر نہیں، کچھ قوتیں پاکستان میں بدامنی پھیلانا چاہتی ہیں، بھارت، پاکستان کا دشمن ملک ہے۔

ان کا کہنا تھا کہ حکومت اور انتظامیہ کو چوکس رہنے کی ضرورت ہے، ہم ریاست کے ساتھ کھڑے تھے اور کھڑے ہیں، ہم ریاست کی سلامتی پر کوئی سودے بازی نہیں کریں گے۔

یہ بھی پڑھیں:

طورخم بارڈر کو 10 روز بعد ہر قسم کی آمدورفت کیلئے بحال کردیا گیا

غفور حیدری نے مزید کہا کہ ریاست ہے تو ہم ہیں، ریاست نہیں تو ہم بھی کچھ نہیں ہیں۔

یاد رہے کہ کوئٹہ میں کراچی کوئٹہ ہائی وے پر سڑک کنارے دھماکے کے نتیجے میں ترجمان پاکستان ڈیموکریٹک موومنٹ (پی ڈی ایم) حافظ حمد اللہ سمیت 11 افراد زخمی ہوئے ہیں جنہیں غوث بخش رئیسانی اسپتال منتقل کیا گیا۔

اسی ضمن میں ترجمان جمعیت علمائے اسلام ایف (جے یو آئی) نے حافظ حمد اللہ کی دھماکے میں زخمی ہونے کی تصدیق کرتے ہوئے کہا کہ حافظ حمد اللہ کی حالت خطرے سے باہر ہے۔