فتح جنگ میں 6 مئی کو مریم نواز تاریخ ساز جلسہ کریں گی۔جاوید لطیف

لاہور: رہنما پاکستان مسلم لیگ (ن) جاوید لطیف نے کہا ہے کہ سابق وزیر اعظم نواز شریف کی صاحبزادی مریم نواز فتح جنگ میں 6 مئی کو جلسہ کریں گی جو تاریخ ساز ہوگا۔

تفصلیلات کے مطابق ن لیگی رہنما جاوید لطیف نے اپنے ایک بیان میں کہا کہ ہر روز پی ٹی آئی حکومت کا نیا اسکینڈل منظرِ عام پر آئے گا۔ ابھی تو پارٹی شروع ہوئی ہے۔ لگژری زندگی گزارنے والے عمران خان کو حساب تو دینا ہی پڑے گا۔ فارن فنڈنگ کیس میں پی ٹی آئی کے حربے تاخیری ہیں۔

یہ بھی پڑھیں:

عمران خان چین سے نہیں بیٹھے گا، خانہ جنگی اور بغاوت ہوگی۔شیخ رشید

بیان میں ن لیگی رہنما جاوید لطیف نے کہا کہ ہم سے رسیدیں دکھانے کا کہنے والے آج بھاگ کیوں رہے ہیں؟ معیشت کو وینٹی لیٹر پر پہنچا دیا گیا جس پر تحریکِ عدم اعتماد کا فیصلہ کرنا پڑا۔ اگر عمران خان 6  ماہ تک مزید وزیر اعظم رہتے تو عوام ان کو گریبان سے پکڑ سکتے تھے۔ انتخابی اصلاحات کے بعد الیکشن کا فیصلہ ہوگا۔

ن لیگی رہنما جاوید لطیف نے کہا کہ ہمیں ایمانداری کا درس دینے والے اس سوال کا جواب دیں کہ یونیورسٹیاں کیوں نہ بنائی جاسکیں؟ ایمانداری کا یہ مقام ہے کہ بنی گالہ سے وزیر اعظم ہاؤس جانے پر ایک ارب روپے لگا دئیے گئے۔ بنیادی ضروریات کیلئے سبسڈی دینا ریاست اپنی ذمہ داری سمجھتی ہے۔ 6مئی کو مریم نواز تاریخ ساز جلسہ کریں گی۔

خیال رہے کہ پاکستان مسلم لیگ (ن) کی شہباز شریف حکومت پیپلز پارٹی سمیت دیگر سیاسی جماعتوں کے اتحاد کی بنیاد پر قائم ہوئی۔ سابق وزیر اعظم عمران خان کے خلاف تحریکِ عدم اعتماد رواں ماہ کے آغاز پر کامیاب ہوئی جس کے بعد ن لیگی رہنما جاوید لطیف سمیت دیگر نے پی ٹی آئی حکومت کو اپنی تنقید کے نشانے پر رکھ لیا ہے۔