ڈاکٹروں نے اجازت دیدی، جہانگیر ترین 15اپریل کو پاکستان کیلئے اڑان بھریں گے

لندن: پاکستان تحریکِ انصاف کے ناراض رہنما جہانگیر خان ترین نے ڈاکٹروں سے اجازت ملنے کے بعد 15 اپریل کو پاکستان کیلئے اڑان بھرنے کا فیصلہ کر لیا ہے۔

تفصیلات کے مطابق پی ٹی آئی رہنما 16 اپریل کو لاہور پہنچیں گے۔ جہانگیر ترین گزشتہ کچھ عرصے سے لندن میں زیرِ علاج تھے جنہیں ڈاکٹروں نے سفر کی اجازت دے دی۔

یہ بھی پڑھیں:

ق لیگ سے مذاکرات ناکام، جہانگیر ترین نے حمزہ شہباز کی حمایت کا اعلان کردیا

پی ٹی آئی کے ناراض رہنما جہانگیر خان ترین نے 15 اپریل کو لندن سے لاہور کا ٹکٹ بک کروا لیا۔ جہانگیر ترین گروپ کے رکنِ اسمبلی عون چوہدری اپنے لیڈر کے استقبال کیلئے تیارہیں۔

جہانگیر ترین پی ٹی آئی کے تمام ناراض دھڑوں سے ملاقات کریں گے۔ عون چوہدری کا کہنا ہے کہ گروپ کے تمام ارکان جہانگیر ترین کا ائیرپورٹ پر استقبال کریں گے۔

علیم خان گروپ کے اراکین بھی ناراض پی ٹی آئی رہنما سے ملاقات کیلئے تیار ہیں۔ جہانگیر ترین علیم خان، سابق گورنر چوہدری سرور اور اسد کھوکھر سے بھی ملاقات کرینگے۔

خیال رہے کہ اس سے قبل پنجاب میں حکومت سازی کیلئے سر توڑ کوششیں ہوئیں۔ ق لیگ سے مذاکرات ناکام ہوجانے کے بعد جہانگیر ترین نے وزارتِ اعلیٰ کیلئے ن لیگی امیدوار حمزہ شہباز کی حمایت کا اعلان کردیا۔

 ق لیگی رہنما مونس الٰہی نے یکم اپریل کو رات گئے جہانگیر ترین گروپ سے ملاقات کی جو بے نتیجہ ختم ہوگئی جس کے دوران وزیر اعلیٰ کے عہدے کیلئے پرویز الٰہی کی حمایت کا فیصلہ نہ ہوسکا۔