جہانگیر خان ترین کی زرعی ٹاسک فورس سے ہٹائے جانے کی خبر کی تردید

اسلام آباد:پاکستان تحریکِ انصاف کے مرکزی اور سینئر رہنما جہانگیر خان ترین نے زرعی ٹاسک فورس کی سربراہی سے ہٹائے جانے کی خبر کی تردید کی ہے۔

سماجی رابطے کی ویب سائٹ ٹوئٹر پر گزشتہ روز اپنے پیغام میں پی ٹی آئی کے مرکزی رہنما جہانگیر خان ترین نے کہا کہ میں نے میڈیا پر یہ خبر دیکھی ہے کہ مجھے زرعی ٹاسک فورس کی سربراہی سے ہٹا دیا گیا ہے جبکہ میں کسی ٹاسک فورس کا کبھی چیئرمین نہیں رہا۔

سینئر رہنما جہانگیر خان ترین نے کہا کہ میڈیا مجھے وہ نوٹیفیکیشن دِکھا دے جس کے تحت مجھے زرعی ٹاسک فورس کا چیئرمین بنایا گیا ہو۔ میری میڈیا سے گزارش ہے کہ براہِ کرم حقائق کو جاننے کے بعد خبر چلایا کریں۔ 

Hello hello, News bring reported that I have been “removed” as C’man Agri Task Force ….I was never chairman of any task force . Can anyone show me a notification with me as C’man ??
Pl get your facts right people

— Jahangir Khan Tareen (@JahangirKTareen) April 6, 2020

یاد رہے کہ اس سے قبل میڈیا پر خبر چلی کہ تحریک انصاف کے سینئر رہنما جہانگیر ترین کو زرعی ٹاسک فورس کے سربراہ کے عہدے سے ہٹاد یا گیا۔

ذرائع کے مطابق چینی بحران پر تحقیقاتی رپورٹ میں انکشاف ہوا تھا کہ بحران میں سے سب سے زیادہ فائدہ اٹھانے والوں میں جہانگیر ترین ہیں اور انہوں نے سبسڈی کی مد میں 56 کروڑ کا منافع حاصل کیا۔

چینی بحران میں جہانگیر ترین کے ملوث ہونے کی خبر کے بعد گزشتہ روز میڈیا کے مختلف چینلز پر یہ خبر نشر کی گئی کہ جہانگیر ترین کو زرعی ٹاسک فورس کی سربراہی سے ہٹا دیا گیا، تاہم انہوں نے آج اِس خبر کی تردید کی ہے۔