گوگل نیوز پر ہمیں فالو کریںاسلام آباد: تحریکِ انصاف کے سینئر مرکزی رہنما جہانگیر خان ترین نے صادق آباد میں طیارہ حادثے کے شہداء کے خاندانوں سے اظہارِ تعزیت کرتے ہوئے لواحقین کے لیے صبرِ جمیل کی دُعا کی ہے۔
سماجی رابطے کی ویب سائٹ ٹوئٹر پر اپنے پیغام میں سینئر مرکزی پی ٹی آئی رہنما جہانگیر خان ترین نے بتایا کہ وفاقی محکمہ برائے پلانٹ پروٹیکشن کا طیارہ ٹڈی دل حملے سے بچاؤ کے لیے اسپرے کرنے گیا تھا۔
پی ٹی آئی رہنما جہانگیر خان ترین نے کہا کہ طیارہ ضلع رحیم یار خان کے قریب گر کر تباہ ہوا جس میں پائلٹ کیپٹن شعیب اور انجینئر فواد بٹ دونوں نے جامِ شہادت نوش کیا۔
طیارہ حادثے پر افسوس کا اظہار کرتے ہوئے تحریکِ انصاف رہنما جہانگیر خان ترین نے دُعا کی کہ اللہ تعالیٰ سوگوار خاندانوں کو صبرِ جمیل عطا فرمائے۔
Inna lillahi wa inna ilai'hay rajeon… Federal Department For Plant protection's aircraft that was being used to spray anti-locust pesticide, crashed near RYK! Captain Shoaib & Engineer Fawad Butt both embraced martyrdom.
May Allah give sabar to the bereaved families. Ameen.
— Jahangir Khan Tareen (@JahangirKTareen) January 12, 2020
یاد رہے کہ اس سے قبل پنجاب کے شہر صادق آباد میں اسپرے کے لیے آنے والا طیارہ فنی خرابی کے باعث گر کر تباہ ہوگیا جس کے نتیجے میں طیارے کے پائلٹ سمیت 2 افراد جان کی بازی ہار گئے۔
ٹڈی دل حملوں سے بچاؤ کے لیے آج وفاق سے پنجاب حکومت کی مدد کے لیے آنے والا طیارہ صادق آباد کے چک 215 میں گر کر تباہ ہوا۔
ترجمان سول ایوسی ایشن اتھارٹی کے مطابق پنجاب کے ضلع رحیم یار خان سے اڑان بھرنے والا طیارہ فنی خرابی کے باعث صادق آباد کے علاقے باندھی میں گرا جس سے 1 پائلٹ اور پلانٹ پروٹیکشن انجینئر جاں بحق ہو گئے۔
مزید پڑھیں: صادق آباد میں طیارہ گر کر تباہ، پائلٹ سمیت 2 افراد جاں بحق
