مزدوروں کا عالمی دن اور بنیادی انسانی حقوق کے استحصال کی تکلیف دہ تاریخ

انسان بڑی عجیب مخلوق ہے۔ جب اس کے پاس طاقت اور اختیار نہیں ہوتا تو مظلوم بن کر فریاد کرتا ہے اور جب اقتدار، پیسہ اور قوت ملتی ہے تو ظلم اور ناانصافی پر اتر آتا ہے اور اپنی ہی طرح کے دیگر انسانوں کے بنیادی حقوق کا استحصال شروع کردیتا ہے۔

مزدوروں کا عالمی دن آج منایا جارہا ہے جس سے حقوق کے حصول کی عالمی تحریک شروع ہوئی تاہم آج بھی بے شمار مزدور ظلم و جبر کی چکی میں پسنے پر مجبور ہیں۔ آئیے بنیادی انسانی حقوق کی تکلیف دہ تاریخ اور عالمی دن کے حوالے سے مختلف حقائق کا جائزہ لیتے ہیں۔

شکاگوکے مزدور اور امریکی حکومت

پاکستان سمیت دنیا بھر میں منائے جانے والے مزدوروں کے حقوق کے عالمی دن کا پس منظر دیکھا جائے تو یہ دن شکاگو میں مزدوروں کی جانب سے کیے گئے احتجاج اور امریکی حکومت کے ظلم و جبر کے خلاف منایا جاتا ہے۔

کم و بیش 135 سال قبل کچھ رہنماؤں نے مزدوروں کے حقوق کے حصول کیلئے ہڑتال کی اپیل کی جبکہ مزدوروں کے مطالبات میں خاص طور پر اوقاتِ کار 12 یا 14 گھنٹوں کی بجائے 8 گھنٹے تک محدود کرنے کا مطالبہ شامل تھا۔ احتجاج کے نتیجے میں صنعتکاروں اور سرمایہ داروں کی فیکٹریاں بند ہو گئیں۔

ایک امریکی اخبار نے اپنی رپورٹ میں یکم مئی 1886ء کے روز تحریر کیا کہ آج کسی بھی فیکٹری کی چمنیوں سے دھویں کے بادل برآمد ہوتے دکھائی نہیں دیتے۔ ہڑتال کے علاوہ مزدوروں نے بے مارکیٹ اسکوائر پر جمع ہو کر احتجاج شروع کردیا۔

تقریباً 25 ہزار ہنر مندوں نے مطالبہ کیا کہ ہر طرح کے مزدوروں کیلئے اوقاتِ کار 8 گھنٹے تک لائے جائیں۔4 روز تک یہ احتجاج جاری رہا تاہم 4 مئی کی رات 180 پولیس افسران آئے اور مزدوروں سے کہا کہ آپ منتشر ہوجائیں۔بعد ازاں پولیس کے مطابق اہلکاروں پر کہیں سے کوئی بم آگرا جس کے بعد پولیس نے اندھا دھند فائرنگ کی۔

فائرنگ کے نتیجے میں 4 افراد جاں بحق اور 70 سے زائد زخمی ہو گئے جنہیں 4 سال بعد خراجِ تحسین پیش کیا گیا اور ملک گیر تحریک چلائی گئی جو کامیاب رہی تاہم کام کے اوقاتِ کار8 گھنٹے مقرر کیے جانے کا مطالبہ پورا نہ ہوسکا۔ 

طویل جدوجہد اور اس کا پھل 

جفا کش مزدوروں کے ساتھ 1886ء میں پیش آنے والے واقعے کی یاد ہر سال منائی جاتی رہی اور کم و بیش 51 برس بعد 1937ء میں زیادہ تر مزدور امریکی حکومت سے 8 گھنٹے تک کے اوقاتِ کار حاصل کرنے میں کامیاب ہوچکے تھے۔

یہ تو امریکا کا قصہ ہے لیکن دنیا بھر کے بیشتر ممالک میں آج بھی بندۂ مزدور کے حالات بے حد تلخ ہیں۔ 2019ء میں دنیا بھر میں 8 گھنٹے کام کرنے کا اصول رائج کیا گیا تاہم پاکستان سمیت متعدد ممالک میں آج بھی صورتحال ناقابلِ بیان حد تک تکلیف دہ ہے۔

مزدوروں کے مسائل اور حل 

کسی بھی مزدور کی زندگی سخت جسمانی محنت و مشقت سے عبارت ہوتی ہے اور دنیا کے مختلف ممالک میں مزدوروں پر کیے گئے ظلم و جبر کی داستانیں مختلف ہیں۔ اجرت پوری نہ ملنا، تنخواہ وقت پر نہ دینا اور اوقاتِ کار کے علاوہ بھی کام کرانا مزدوروں کے اہم مسائل ہیں۔

مسئلہ یہ بھی ہے کہ پاکستان سمیت متعدد ممالک میں سرمایہ دار اور صنعتکار مزدوروں کو انسان سمجھنے کی بجائے مشین سمجھ لیتے ہیں اور جسمانی استعداد سے بڑھ کر مزدوری لیتے ہیں جس کے نتیجے میں بے شمار مزدور ہلاک بھی ہوجاتے ہیں۔

کام کرنے کی جگہوں، فیکٹریوں اور ملز میں مزدوروں کی زندگی بچانے کیلئے خاطر خواہ انتظامات نہیں کیے جاتے جس کے نتیجے میں کام کرتے ہوئے بے شمار مزدور کیمیکل میں ڈوب کر، بلندی سے گر کر یا آتشزدگی کے نتیجے میں جھلس کر جاں بحق ہوجاتے ہیں۔ 

سب سے بڑا مسئلہ بچوں کو مزدور بنانے کا مسئلہ ہے۔ سندھ میں 21 اعشاریہ 5 فیصد بچے جن کی عمریں 5 سے 14 سال تک ہیں، مزدوروں کی طرح کام کرتے ہیں۔ پاکستان کے تقریباً 1 کروڑ 10 لاکھ بچے گھریلو کام کاج اور مزدوریاں کرتے ہیں۔

ضرورت اس بات کی ہے کہ ہنر مندوں کو بھی انسان سمجھا جائے اور صنعتکار یا سرمایہ دار لوگ جو فیکٹریوں کے مالک ہیں یا جو ٹھیکیدار مستری اور مزدوروں سے کام لے کر تعمیرات سمیت دیگر کام کرواتے ہیں، انہیں مناسب اور بر وقت تنخواہیں دیں اور ان کے دیگر حقوق کا خاطرخواہ خیال رکھیں جس کیلئے لیبر قوانین پر عمل بے حد ضروری ہے۔