گوگل نیوز پر ہمیں فالو کریںبھارتی فوج کا ایک ہیلی کاپٹر بھوٹان میں گر کر تباہ ہو گیا جس کے نتیجے میں 2 پائلٹ ہلاک ہو گئے ہیں۔
بھارتی میڈیا کے مطابق انڈین فوج کے ایک چھوٹے ہیلی کاپٹر نے اروناچل پردیش سے تربیتی پرواز بھری تاہم کچھ ہی دیر بعد یونپھولا کے مقام پر ہیلی کاپٹر کا رابطہ کنٹرول روم سے منقطع ہوگیا۔
ہیلی کاپٹر جس کا نام چیتا بتایاگیا یونپھولا میں لینڈنگ کے لیے پہنچا تھا لیکن وہ قریبی پہاڑی کھنتونمانی میں گر کر تباہ ہوگیا، ، جس کے نتیجے میں بھارتی فوج کے لیفٹننٹ کرنل رینک کا ایک پائلٹ زندگی کی بازی ہار گیا جبکہ دوسرا مرنے والا پائلٹ بھوٹان کا تھا جو تربیت کے لیے بھارتی فوج کے ساتھ تھا، واقعے کی تحقیقات کے لیے انکوائری کمیٹی تشکیل دے دی گئی ہے۔
دو روز قبل بھی بھارتی فضائیہ کا مگ 21 جنگی طیارہ ریاست مدھیہ پردیش میں گر کر تباہ ہو گیا تھا، تاہم جہاز کےدونوں پائلٹ محفوظ رہے تھے۔
واضح رہے کہ گزشتہ 6 ماہ کے دوران بھارت کے 5 طیارے اور 4 ہیلی کاپٹرز مختلف مقامات پر گر کر تباہ ہوگئے ہیں جس کے باعث بھارتی پائلٹس میں خوف و ہراس پھیل گیا ہے۔
