لاہور: چیئرمن پی ٹی آئی و سابق وزیر اعظم عمران خان نے کہا ہے کہ آج بلدیاتی انتخابات منعقد نہ کرکے الیکشن کمیشن نے خود کو حکومت کی بی ٹیم ثابت کردیا ہے۔
سماجی رابطے کی ویب سائٹ ٹوئٹر پر اپنے پیغام میں چیئرمین تحریکِ انصاف عمران خان نے کہا کہ آج الیکشن کمیشن نے اسلام آباد میں بلدیاتی انتخابات کے انعقاد کے حوالے سے ہائیکورٹ کے حکم پر عمل نہیں کیا۔
ٹوئٹر پیغام میں سابق وزیر اعظم عمران خان نے الیکشن کمیشن کے متعلق کہا کہ انہوں نے عدالتی حکم پر عمل نہ کرکے ایک بار پھر ثابت کردیا کہ کمیشن امپورٹڈ حکومت اور اس کے سرپرستوں کی بی ٹیم ہے۔
آج اسلام آباد میں بلدیاتی انتخابات کےانعقاد کےحوالے سےاسلام آباد ہائیکورٹ کےحکم پر عمل نہ کر کےECP نےپھرسےثابت کیاہےکہ یہ امپورٹڈحکومت اور اسکے سرپرستوں کی بی-ٹیم ہے۔عوام سےخوفزدہPDM ہر انتخابی میدان سےبھاگ رہی ہے۔ووٹ کاحق بنیادی جمہوری اصول ہےاورPTI پوری دلجمعی سےاس پر قائم ہے
— Imran Khan (@ImranKhanPTI) December 31, 2022
سابق وزیر اعظم عمران خان نے کہا کہ عوام سے خوفزدہ پی ڈی ایم ہر انتخابی میدان سے بھاگ رہی ہے۔ ووٹ کا حق بنیادی جمہوری اصول ہے اور پی ٹی آئی پوری دلجمعی سے اس پر قائم ہے۔
الیکشن کمیشن کا قصور؟
قبل ازیں اسلام آباد ہائیکورٹ کے احکامات کے باوجود شہرِ اقتدار میں بلدیاتی انتخابات کیلئے پولنگ شروع نہیں ہوئی۔ عدالت نے الیکشن کمیشن حکام کو 31 دسمبر کے روز ہی بلدیاتی انتخابات منعقد کروانے کا حکم دیا تھا۔
الیکشن کمیشن نے بلدیاتی انتخابات کیلئے نہ تو کوئی انتظام کیا اور نہ ہی پولنگ کا عملہ متعلقہ حلقوں میں پولنگ کیلئے پہنچا۔ وفاقی حکومت کی جانب سے سکیورٹی انتظامات یا عملے کی فراہمی بھی عوام کو کہیں نظر نہ آسکی۔
دوسری جانب ووٹرز کی بڑی تعداد اپنا ووٹ ڈالنے متعلقہ پولنگ اسٹیشنز پر جا پہنچی تاہم پولنگ اسٹیشنز بند تھے جس پر عوام نے بھرپور احتجاج کیا۔ حکومت عدالت کے سنگل بینچ فیصلے کو چیلنج کرنے کا اعلان کرچکی ہے۔
یہی نہیں، بلکہ الیکشن کمیشن نے بھی وفاقی حکومت کی بجائے عدالتی فیصلے کے خلاف ہی انٹرا کورٹ اپیل دائر کرنے کا فیصلہ کر رکھا ہے۔ پی ٹی آئی رہنماؤں کا کہنا ہے کہ الیکشن کمیشن امپورٹڈ حکومت کی کٹھ پتلی بنا ہوا ہے۔