عمران خان سابقہ حکمرانوں کی طرح ملک و قوم کی قیمت پر اپنی سیاست نہیں چمکائیں گے، ہمایوں اختر

اسلام آباد :پاکستان تحریک انصاف کے سینئر مرکزی رہنما و سابق وفاقی وزیر ہمایوں اختر خان نے کہا ہے کہ اپوزیشن جتنامرضی واویلا کر لے احتساب کے بیانیے میں کوئی تبدیلی نہیں آئے گی ۔

اپوزیشن کا ڈیڑھ سال سے ایک ہی بیانیہ ہے کہ کرپشن پرگرفتارہمارے لوگوں کو چھوڑ دیا جائے ،حکومت نے معیشت کومشکلات سے نکالنے کیلئے اپنے سیاسی مفادات کو پس پشت ڈالتے ہوئے غیرمقبول فیصلے کئے اورعوام حکومت کی نیک نیتی سے کی جانے والی کاوشوں سے آگاہ ہیں۔

ان خیالات کا اظہار انہوں نے پارٹی رہنمائوں سے ملاقات میں گفتگو اورایک تقریب میںشرکت کے موقع پر خطاب کرتے ہوئے کیا۔

ہمایوں اختر خان نے کہا کہ آئین میں آرڈیننس جاری کرنے کی گنجائش موجود ہے اور اس نے بالآخر پارلیمنٹ میں ہی آنا ہے۔

ترمیمی آرڈیننس کے ذریعے کسی طبقے کو چھوٹ نہیں دی گئی بلکہ نیب کے کردار کو واضح کیا گیا ہے ،اپوزیشن اطمینان رکھے حکومت کے احتساب کے بیانیے میں کوئی تبدیلی نہیں آئے گی اور جس نے بھی ملک و قوم کی دولت لوٹی ہے وہ احتساب کے اداروں اور عدالتوں کا سامنا کرے گا۔

مزید پڑھیں:(ن)لیگ کا آرمی چیف کی مدت ملازمت میں توسیع کیلئے ترمیم کی حمایت کا فیصلہ

انہوں نے کہا کہ سابقہ دورمیں اپنے سیاسی فائدے کیلئے روپے کو مصنوعی طریقے سے اوور ویلیو رکھا گیا جس کا خمیازہ آج پوری قوم بھگت رہی ہے۔

وزیراعظم عمران خان بھی اس طرح کے مصنوعی اقدامات سے معیشت کو سہارا د ے سکتے تھے لیکن ہم ملک و قوم کی قیمت پر اپنی سیاست نہیں چمکائیں گے۔

وزیر اعظم عمران خان نے اپنے سیاسی مفادات کو پس پشت ڈالتے ہوئے غیر مقبول فیصلے کئے کیونکہ ہم معیشت کو حقیقی معنوں میں ترقی دینا چاہتے ہیں اور عوام حکومت کی نیک نیتی پر مبنی اقدامات سے آگا ہ ہیں۔

ہمایوں اخترخان نے کہا کہ پاکستان مشکل دورسے نکل آیا ہے ، انشا اللہ نئے سال میں پالیسی ریٹ میںکمی ہو گی جس سے مینو فیکچرنگ سیکٹر کی گروتھ ہو گی اور اس سے روزگار کے مواقع پیدا ہوں گے۔

ہماری ٹیکس آمدنی کا 75 فیصد مینو فیکچرنگ سیکٹر سے آتا ہے ۔ انہوں نے کہا کہ حکومت نے مشکل معاشی حالا ت کے باوجود احساس پروگرام کے تحت رواں مالی سال میں80ارب روپے اور 300یونٹس سے کم بجلی استعمال کرنے والے طبقے کو بوجھ سے بچانے کے لئے سبسڈی کی مد میں54ارب روپے رکھے ہیں۔