گوگل نیوز پر ہمیں فالو کریںلاہور: چیئرمین تحریکِ انصاف و سابق وزیر اعظم عمران خان نے راجن پور سے خالی قومی اسمبلی کی نشست کیلئے ضمنی الیکشن خود لڑنے کا فیصلہ کر لیا جس کا اعلان جلد متوقع ہے۔
تفصیلات کے مطابق عمران خان ضمنی انتخاب میں حصہ لیں گے۔ ذرائع پی ٹی آئی کا دعویٰ ہے کہ چیئرمین پی ٹی آئی پارٹی قیادت کی تجویز پر انتخاب لڑیں گے۔
فوج مثبت رول ادا کرے تو ملک کو آگے جانے سے کوئی نہیں روک سکتا، عمران خان
قبل ازیں مسلم لیگ (ن) چھوڑ کر تحریکِ انصاف میں شامل ہونے والے سردار جعفر خان لغاری کے انتقال پر خالی ہونے والی نشست کیلئے چیئرمین پی ٹی آئی عمران خان نے انتخاب لڑنے کا عندیہ دے دیا۔
سردار جعفر خان لغاری جام پور کے حلقہ این اے 193 سے منتخب ہو کر 2018 کے الیکشن کے ذریعے رکنِ قومی اسمبلی بنے، تاہم اپنی 5 سالہ مدت پوری کرنے سے قبل ہی لاہور میں دل کا دورہ پڑنے سے انتقال کر گئے۔
طویل عرصے سے کینسر میں مبتلا سردار جعفر خان لغاری کی نمازِ جنازہ بھی لاہور میں ادا کردی گئی۔ تحریکِ انصاف کے متعدد رہنماؤں نے سردار جعفر لغاری کے انتقال پر افسوس اور تعزیت کا اظہار کیا تھا۔
