پاکستان نے دہشت گردی کے خلاف جنگ کی بھاری ترین قیمت ادا کی۔عمران خان

اسلام آباد: چیئرمین پی ٹی آئی عمران خان نے کہا ہے کہ پاکستان نے امریکا کی جانب سے شروع کی گئی دہشت گردی کے خلاف جنگ کی سب سے بھاری قیمت ادا کی ہے۔ ہمیں دھمکی دی گئی تھی کہ پاکستان کو پتھر کے دور میں پہنچا دیا جائے گا۔

تفصیلات کے مطابق سمندر پار پاکستانیوں سے خطاب کرتے ہوئے عمران خان نے کہا کہ پاکستان کا نائن الیون جنگ سے کوئی لینا دینا نہ تھا۔ پاکستان کا لیڈر امریکی رہنما کی دھمکی برداشت نہ کرپایا اور ہم دہشت گردی کی جنگ میں کود گئے۔

یہ بھی پڑھیں:

مجھے نازیبا ویڈیوز بنوانے پر مجبور کیا گیا، عامر لیاقت پر تیسری اہلیہ کا الزام

خطاب کے دوران سابق وزیر اعظم عمران خان نے کہا کہ دہشت گردی کے خلاف جنگ میں ہم نے بھاری جانی نقصان اٹھایا، پاکستان کے تین گنا فوجیوں نے جامِ شہادت نوش کیا۔ میں امریکا مخالف یا یورپ مخالف کبھی نہیں رہا، دوستی چاہئے، غلامی نہیں۔

سابق وزیر اعظم نے کہا کہ امریکا کم قیمت پر تیل خریدنے کے روس سے ہونے والے معاہدے پر ناراض ہوا۔ میں نے دہشت گردی کے خلاف جنگ کی 15سال تک مخالفت کی۔ میں روس سے دعوت ملی اور گیس سے متعلق پہلے سے بات ہورہی تھی۔

چیئرمین پی ٹی آئی عمران خان نے کہا کہ افغانستان میں ہونے والی جنگ میں ناکامی پر الزام پاکستان پر آیا۔ سازش تیار ہونے پر پاکستان کے میر جعفر اور میر صادق ان سے جا ملے۔ مجھے جولائی میں علم ہوگیا تھا کہ کچھ ہورہا ہے۔

عمران خان نے کہا کہ امریکی سفارتخانے میں اپوزیشن رہنماؤں سے ملاقاتوں کا سلسلہ بڑھ گیا۔ منحرف ارکان سے بھی ملاقاتیں کی گئیں۔ امریکا نے ہم سے فوجی اڈے پھر مانگے۔ دھمکی آمیز خط کے اگلے روز تحریکِ عدم اعتماد پیش ہوگئی۔