گوگل نیوز پر ہمیں فالو کریںکراچی: پی ٹی آئی کے سینئر مرکزی رہنما و سابق گورنر سندھ عمران اسماعیل نے کہا ہے کہ لانگ مارچ کیلئے قوم گھروں سے نکل چکی، حکومت انقلاب روکنے کی غلطی نہ کرے۔ ابھی مارچ میں پنجاب شامل ہوا ہے، دیگر صوبے تو باقی ہیں۔
سماجی رابطے کی ویب سائٹ ٹوئٹر پر اپنے پیغام میں سابق گورنر سندھ عمران اسماعیل نے کہا کہ عمران خان کے حقیقی آزادی مارچ میں ابھی صرف پنجاب کے لوگ شامل ہوئے ہیں۔ خیبر پختونخوا، سندھ، جنوبی پنجاب، بلوچستان، آزاد کشمیر اور گلگت بلتستان تو باقی ہے۔
لانگ مارچ ساتویں روز میں داخل، قافلے وزیر آباد کیلئے روانہ
ٹوئٹر پیغام میں عمران اسماعیل نے کہا کہ مارچ میں دیگر صوبوں سے عوام کی شمولیت ہونی ہے۔ ابھی سے حکومت دن میں 15 پریس کانفرنسز کر رہی ہے۔ بعد میں ان کی کیا حالت ہوگی؟ انتخابات یا انقلاب کا نعرہ لے کر پاکستانی قوم اب نکل چکی ہے۔
مارچ میں ابھی صرف پنجاب کےلوگ شامل ہیں کے پی،سندھ،جنوبی پنجاب،بلوچستان،آزاد کشمیر،جی بی کی عوام توابھی باقی ہے ابھی سے دن میں 15پریس کانفرنس ہورہی ہیں بعد میں ان کی کیا حالت ہوگی انتخابات یاانقلاب کانعرہ لیکر پاکستانی قوم اب نکل چکی ہےامپورٹڈسرکار اس انقلاب کوروکنے کی غلطی نہ کرے
— Imran Ismail (@ImranIsmailPTI) November 3, 2022
خیال رہے کہ چیئرمین پی ٹی آئی و سابق وزیر اعظم عمران خان کے حقیقی آزادی لانگ مارچ کا آج ساتواں روز ہے۔ سندھ سے بھی ایک قافلہ حال ہی میں پنجاب پہنچا تھا جس کا صادق آباد میں استقبال ہوا۔ سابق گورنر عمران اسماعیل نے کہا کہ امپورٹڈ سرکار انقلاب کو روکنے کی غلطی نہ کرے۔
چیئرمین پی ٹی آئی عمران خان نے جمعے کے روز شروع ہونے والے لانگ مارچ کے شرکاء سے مختلف مقامات پر خطاب کیا اور وزیر اعظم شہباز شریف، وفاقی کابینہ اراکین اور حکومت کی پالیسیوں کو کڑی تنقید کا نشانہ بنایا۔ مارچ میں پی ٹی آئی کارکنان نے نعرے بازی بھی کی۔
