گوگل نیوز پر ہمیں فالو کریںمسلم لیگ نواز کے صدر شہباز شریف نے کہا ہے کہ کراچی میں بارش کے بعد بننے والی صورتحال سے ہماری اور پیپلز پارٹی کی کارکردگی کا موازنہ ہو گیا ہے۔
لاہور میں پریس کانفرنس سے خطاب کرتے ہوئے شہباز شریف نے کہا کہ اگر خدانخواستہ یہ حالت لاہور میں ہوتی تو بلاول سے کہتا کہ آئیں میرے حلقے سے الیکشن لڑ لیں، میں سیاست چھوڑ رہا ہوں۔
انہوں نے کہا کہ گزشتہ روز جو کراچی میں ہوا، ٹھاٹھیں مارتا سمندر جس میں بچے، بڑے اور خواتین جس طرح مشکلات کا شکار ہوئیں۔
شہباز شریف نے بلاول بھٹو کا نام لیے بغیر کہا کہ میرے مہربان، میں کہہ رہا تھا کہ موازنہ کر لیں۔ کراچی میں موازنہ ہو گیا۔
سابق وزیراعظم نے کہا کہ یہ الیکشن پاکستان کے مستقبل کا فیصلہ کرے گا۔ ملک کے بچوں کا مستقبل الیکشن سے جڑا ہے۔
شہباز شریف نے کہا کہ چور چور اور ڈاکو کا ورد کر کے ملک میں بدتمیزی کا طوفان لایا گیا جس کو روکنا اب بہت مشکل ہو رہا ہے۔
مسلم لیگ ن کے صدر نے کہا کہ ترقی اور سیاسی استحکام آپس میں جڑے ہوئے ہیں، الزامات لگائے گئے۔ یہ سب پی ٹی آئی نے کیا اور کچھ قوتوں نے اُس میں اضافہ کیا۔
