دیامر میں غیرت کے نام پر جواں سال مسجد امام کے ہمراہ لڑکی بھی قتل

 گلگت بلتستان کے علاقے دیامر کے ایک گاؤں میں مسجد امام اور ایک خاتون کو مبینہ طور پر غیرت کے نام پر قتل کیا گیا ہے۔ واقعہ 2 روز قبل پیش آیا۔

تفصیلات کے مطابق دیامر کے گاؤں گیس بالا میں نامعلوم افراد نے فائرنگ کرکے 25سالہ مسجد امام خالد محمود اور 20 سالہ سفینہ بی بی کو قتل کردیا۔ دونوں افراد موقعے پر ہی دم توڑ گئے۔

یہ بھی پڑھیں:

کراچی، پولیس ہیڈ کوارٹر میں دستی بم دھماکا، 2 اہلکار شہید

امام مسجد کے بھائی محمد اکبر نے تھانہ گونر فارم میں نامعلوم ملزمان کی گرفتاری کیلئے درخواست دے دی۔ پولیس نے ملزمان کی تلاش کیلئے چھاپہ مار کارروائی شروع کردی ہے۔

حکام کا کہنا ہے کہ ابتدائی تحقیقات کے مطابق واقعہ ذاتی دشمنی یا پھر غیرت کے نام پر قتل کا محسوس ہوتا ہے۔ محمد اکبر کا کہنا ہے کہ میرے بھائی کو نماز کی ادائیگی کے بعد قتل کیا گیا۔

مقتول کے بھائی محمد اکبر نے کہا کہ ملزمان لڑکی کے بھائی تھے جنہوں نے اپنی بہن اور میرے بھائی کو بے قصور ہی عقب سے فائرنگ کرکے قتل کیا۔ میرے بھائی کو 8 گولیاں لگی تھیں۔

محمد اکبر کا کہنا ہے کہ ہم انصاف حاصل کرنا چاہتے ہیں جس کیلئے پولیس سے رجوع کیا۔ مقتولین کو فائرنگ کا نشانہ بنانے والوں کو قرار واقعی سزا ملنے کی امید ہے۔ اہلِ خانہ کا کہنا ہے کہ دونوں مقتول پڑوسی تھے۔