معروف دانشور اور فنکار انور مقصود کے حوالے سے سوشل میڈیا پر خبریں گردش کر رہی ہیں کہ انہیں لاپتا کر دیا گیا ہے، جس کی اب وضاحت آگئی ہے۔
انور مقصود نے اپنے حالیہ متنازعہ بیان پر پیدا ہونے والی غلط فہمیوں پر وضاحت دی ہے۔ آرٹس کونسل کراچی میں اپنی تقریر کے دوران انور مقصود نے مسلح افواج اور نیوی کے حوالے سے کیے گئے اپنے مزاحیہ تبصرے پر معذرت کی اور اغوا کی خبروں کو غلط قرار دیا ہے۔
بیٹیوں کی شادیاں کردیں لیکن، جانتے ہیں شاہد آفریدی نانا کا کردار ادا کرنے کیلئے کیوں تیار نہیں ؟
انہوں نے کہا کہ ان کے بیان کا مقصد کسی کی دل آزاری کرنا ہرگز نہیں تھا اور وہ ہمیشہ اپنے تبصروں میں طنز و مزاح کا سہارا لیتے ہیں۔ انور مقصود نے اس موقع پر ان خبروں کی بھی سختی سے تردید کی جن میں ان کے اغوا یا انہیں ’اوپر‘ سے کال آنے کے دعوے کیے جا رہے تھے۔ انہوں نے وضاحت کی کہ وہ بخیر و عافیت ہیں اور ایسی تمام افواہیں بے بنیاد ہیں۔
انور مقصود کا کہنا تھا کہ وہ پاکستان کے تمام اداروں، بشمول نیوی اور مسلح افواج کا احترام کرتے ہیں۔ انہوں نے مزید کہا کہ ان کا طنز ہمیشہ اصلاح کی نیت سے ہوتا ہے نہ کہ کسی کی توہین کے لیے۔ انور مقصود نے اپنی گفتگو کے اختتام پر محبت اور اتحاد کا پیغام دیتے ہوئے کہا کہ وہ ہمیشہ ملک و قوم کے خیرخواہ ہیں۔
اس موقع پر پروگرام میں موجود حاضرین نے ان کے بیان کا خیرمقدم کیا اور ان کی دیانت داری کو سراہا۔
یاد رہے کہ سوشل میڈیا پر یہ خبریں گردش کر رہی تھیں کہ انور مقصود کو اغوا کرلیا گیا ہے جس پر ساتھی اداکاروں سمیت سوشل میڈیا صارفین کی جانب سے تشویش کا اظہار کیا جارہا تھا۔