گوگل نیوز پر ہمیں فالو کریںہرارے: دوسرے ٹیسٹ کی پہلی اننگز میں زمبابوے کی ساری ٹیم پاکستان کے خلاف 132 رنز بنا کر آؤٹ ہو گئی ہے۔ پاکستان نے زمبابوے کو فالوآن کروادیا ہے۔
ہرارے میں پاکستان اور زمبابوے کے درمیان 2 ٹیسٹ میچوں کی سیریز کے دوسرے ٹیسٹ میں پاکستان نے پہلی اننگز میں عابد علی کی ڈبل سنچری اور اظہر علی کی سنچری کی بدولت 510 رنز بنائے تھے اور 8 کھلاڑی آؤٹ پر اننگز ڈیکلیئر کردی تھی ۔ جواب میں میزبان ٹیم نے کھیل کے دوسرے دن اختتام تک 4 وکٹ کے نقصان پر 52 رنز بنائے تھے۔
کھیل کے تیسرے دن زمبابوے نے اننگز کا آغاز کیا تو پاکستان کی پہلی اننگز کا خسارہ پورا کرنے کے لیے 450 سے زائد رنز درکار تھے تاہم حسن علی اور ساجد خان کی شاندار بولنگ کے آگے میزبان ٹیم زیادہ دیر وکٹ پر کھڑی نہ رہ سکی اور صرف 84 رنز کے اضافے کے بعد پوری ٹیم 132 رنز بناکر پویلین لوٹ گئی۔
200 up for Abid Ali – first double hundred in Tests for the opener ????????#ZIMvPAK | #HarHaalMainCricket | #BackTheBoysInGreen pic.twitter.com/yv7jeL4FQt
— Pakistan Cricket Live (@TheRealPCB_Live) May 8, 2021
اس سے قبل قومی ٹیم کی جانب سے اظہر علی اور عابد علی نے پہلے دن شاندار کھیل پیش کرتے ہوئے سنچریاں مکمل کیں تاہم اظہر علی پہلے دن کے اختتام پر 126 رنز بناکر آؤٹ ہوگئے۔ کپتان بابراعظم 2 اور فواد عالم 5 رنز بناسکے۔
اوپننگ بلے باز عابد علی نے کھیل کے دوسرے روز بھی اپنی شاندار بیٹنگ کا سلسلہ جاری رکھتے ہوئے 393 گیندوں پر ڈبل سنچری اسکور کی جس میں انہوں نے 28 چوکے بھی لگائے۔ وہ 215 رنز پر ناٹ آؤٹ رہے جب کہ نعمان علی نے اپنی پہلی نصف سنچری بنائی اور بدقسمتی سے صرف 3 رنز کی کمی سے سنچری نہ بناسکے اور 97 رنز اسٹیمپ آؤٹ ہوگئے۔
اوپنر عابد علی نے کریئر کی پہلی ڈبل سنچری اسکور کی وہ ہرارے میں ڈبل سنچری بنانے والے دوسرے پاکستانی بلے باز بن گئے۔ اس سے قبل سابق کپتان اور موجودہ بیٹنگ کوچ یونس خان نے 2013 میں ڈبل سنچری اسکور کی تھی۔
واضح رہے کہ 2 ٹیسٹ میچوں کی سیریز میں قومی ٹیم کو 0-1 کی برتری حاصل ہے، پاکستان نے پہلے ٹیسٹ میں زمبابوے کو ایک اننگز 116 رنز سے شکست دی تھی۔
یہ بھی پڑھیں : سیف علی اور کرینہ کپور کے دونوں بیٹوں کی تصویر سوشل میڈیا پر وائرل
