گورنر ہاؤس میں حلف برداری کی اجازت نہیں، غنڈوں کے زور پر تقریب ہورہی ہے۔عمر چیمہ

لاہور: گورنر پنجاب عمر سرفراز چیمہ نے کہا ہے کہ گورنر ہاؤس میں کسی تقریبِ حلف برداری کی اجازت نہیں دی، غنڈوں کے زور پر تقریب منعقد کی جارہی ہے۔

سماجی رابطے کی ویب سائٹ ٹوئٹر پر اپنے پیغام میں گورنر پنجاب نے کہا کہ گورنر ہاؤس میں حمزہ شہباز کی تقریبِ حلف برداری کی اجازت نہیں دی۔ نئی صورتحال میں غنڈوں کے زور پر تقریب کا انعقاد مجرمانہ فعل ہے۔

یہ بھی پڑھیں:

گورنر پنجاب نے آئینی اعتراض لگا کر عثمان بزدار کا استعفیٰ مسترد کردیا

ٹوئٹر پیغام میں گورنر پنجاب عمر سرفراز چیمہ نے مزید کہا کہ انتظامیہ کو مسلسل تنبیہ کی اگر فوری طور پر گورنر ہاؤس خالی نہیں کرتے تو نتائج کے ذمہ دار چیف سیکریٹری اور آئی جی پنجاب ہوں گے۔ 

گورنر ہاؤس میں حلف برداری کی اجازت نہیں دی

نئی صورت حال میں غندوں کے ذور پر تقریب کا انعقاد مجرمانہ فعل ہے

انتظامیہ کو مسلسل وارننگ دی کہ اگر فوری طور پر گورنر ہاؤس خالی نہیں کرتے تو نتائج کے ذمہ دار چیف سکرٹری اور آئی جی پنجاب ہونگے

— Omar Sarfraz Cheema (@OmarCheemaPTI) April 30, 2022

دوسری جانب سابق وفاقی وزیر ِ اطلاعات و نشریات  اور پی ٹی آئی رہنما  فواد چوہدری نے پنجاب میں جاری سیاسی رسہ کشی  کے تناظر میں اپنے ٹوئٹر پیغام میں کہا کہ چیف جسٹس پاکستان پنجاب میں آئینی بحران کا نوٹس لیں۔ حمزہ شہباز کا غیر قانونی حلف روکا جائے اور فریقین کو سن کر فیصلہ کیا جائے۔ 

چیف جسٹس پاکستان پنجاب میں آئینی بحران کا نوٹس لیں، حمزہ شہباز کا غیر قانونی حلف روکا جائے اور فریقین کو سن کر فیصلہ کیا جائے۔۔ #امپورٹڈ_حکومت_نامنظور

— Ch Fawad Hussain (@fawadchaudhry) April 30, 2022

خیال رہے کہ اس سے قبل گورنر پنجاب عمر سرفراز چیمہ نے وزیر اعلیٰ عثمان بزدار کا استعفیٰ آئینی اعتراض کے ساتھ مسترد کردیا جس سے صوبے میں نیا آئینی بحران پیدا ہوگیا۔ نو منتخب وزیر اعلیٰ حمزہ شہباز بھی آج ہی حلف اٹھائیں گے۔

 عثمان بزدار نے اپنے عہدے سے استعفیٰ گورنر کی بجائے سابق وزیر اعظم عمران خان کے نام تحریر کیا تھا جو آئینی طور پر درست نہیں۔ گورنر پنجاب نے اسپیکر پنجاب اسمبلی پرویز الٰہی کے نام  خط بھی لکھ دیا۔