حکومت کا یکم مارچ سے تعلیمی ادارے مکمل طور پر کھولنے کا اعلان

اسلام آباد: ملک میں کورونا وائرس کے کیسز میں کمی کے بعد وفاقی وزیر تعلیم شفقت محمود نے یکم مارچ سے ملک بھر کے تمام تعلیمی ادارے ہفتے میں 5 روز معمول کے مطابق کھولنے کا اعلان کیا ہے ۔

شفقت محمود نے اپنے ٹوئٹر پیغام میں ملک بھر کے تعلیمی ادارے یکم مارچ سے ہفتے میں 5 روز کھولنے کا اعلان کرتے ہوئے بتایا کہ ملک کے کچھ بڑے شہروں کے اسکول 28 فروری تک مرحلہ وار کلاسز لیں گے۔

وفاقی وزیر تعلیم شفقت محمود کا مزید کہنا ہے کہ اللہ کے فضل سے ہم نارمل حالات کی جانب جا رہے ہیں، فیصلے کا اطلاق ان تمام شہروں پر ہو گا جہاں پابندیاں عائد کی گئی تھیں۔

Important announcement. All schools will go back to regular 5 day classes from Monday March 1. Restrictions imposed in some major cities on schools to conduct staggered classes was only till Feb 28.

— Shafqat Mahmood (@Shafqat_Mahmood) February 25, 2021

واضح رہے کہ نیشنل کمانڈ اینڈ آپریشن سینٹر کی جانب سے ملک بھر میں کورونا وباء کی صورتحال پر غور کے بعد 15 مارچ سے مزارات، سینما ہالز اور ان ڈور شادیوں کی اجازت دینے کا فیصلہ کر لیاگیا ہے۔

این سی او سی کے جاری کردہ نوٹیفکیشن میں کہا گیا ہے کہ سینما ہالز، مزارات اور انڈور شادیوں میں کورونا ایس او پیز پر سختی سے عمل کرنا ہوگا۔

دوسری جانب پی ایس ایل میچز میں شائقین کی تعداد 20 فیصد سے 50 فیصد بڑھانے کا بھی فیصلہ کر لیا گیا ہے۔

مزید پڑھیں:کورونا کیسز میں کمی، این سی او سی کا 15 مارچ سے پابندیاں کم کرنیکا فیصلہ

پی ایس ایل میچز میں اسٹیڈیم کی گنجائش کے مطابق شائقین کے داخلے کی اجازت ہوگی، جبکہ پلے آف میچز میں ایس او پیز کے تحت تمام شائقین کو آنے کی اجازت کا فیصلہ کیا گیا ہے۔

تجارتی مراکز اور پارکس میں اوقات کار کی پابندی اور 50 فیصد اسٹاف کے گھر سے کام کی شرط بھی ختم کر دی گئی ہے تاہم ماسک پہننے اور سماجی فاصلوں کے حوالے سے ایس او پیز پر عمل درآمد جاری رہے گا۔