گوگل نیوز پر ہمیں فالو کریںشہرِ قائد میں آج سے 4 روز تک گیس کی قلت اور لوڈ شیڈنگ کا خدشہ ہے جبکہ محکمۂ موسمیات نے موسم گرم اور مرطوب رہنے کی پیشگوئی کردی۔
تفصیلات کے مطابق کراچی سمیت سندھ کے بیشتر اضلاع میں موسم گرم اور مرطوب رہے گا۔ اس دوران 4 روز تک کراچی میں گیس کی قلت اور کے الیکٹرک کی طرف سے لوڈ شیڈنگ میں اضافے کا خدشہ ہے۔
سوئی سدرن گیس کمپنی کا کہنا ہے کہ کراچی میں مختلف صنعتوں کے علاوہ گھروں کو بھی گیس کی فراہمی میں کمی ہوسکتی ہے۔ کے الیکٹرک، نوری آباد پاور کمپنی کو بھی گیس کی فراہمی کم رہے گی۔
گیس کی فراہمی میں کمی کی وجوہات بتاتے ہوئے سوئی سدرن گیس کمپنی کے ترجمان کا کہنا ہے کہ گیس میں قلت ایل این جی ٹرمینل پر جاری کام کے باعث ہوگی۔ کام ختم ہوتے ہی گیس کی فراہمی بحال کی جائے گی۔
دوسری جانب کے الیکٹرک کا کہنا ہے کہ گیس کی فراہمی میں قلت کے باعث لوڈ شیڈنگ کی جاسکتی ہے۔ آج سے 4 روز تک کے الیکٹرک کو اگر مطلوبہ مقدار میں گیس فراہم نہ کی گئی تو لوڈ شیڈنگ میں اضافہ بھی ہوسکتا ہے۔
خیال رہے کہ سندھ اور بلوچستان میں سی این جی اسٹیشنز کو گیس کی فراہمی 14 سے 17 ستمبر تک بند رکھی جائے گی جس کا اطلاق آج شب 12 بجے سے ہوگا۔
گزشتہ روز جاری کردہ سوئی سدرن گیس کمپنی (ایس ایس جی سی) کے بیان کے مطابق آج رات 12 سے ہفتے کی صبح 8 بجے تک سی این جی اسٹیشنز اور آرایل این جی بند رہیں گے۔اینگرو ایل این جی ٹرمینل ڈاکنگ سے سسٹم میں گیس کی کمی ہوگی۔
مزید پڑھیں: سی این جی اسٹیشنز کو گیس کی فراہمی 4 روز کیلئے بند
