نیو یارک، وزیر خارجہ بلاول بھٹو زرداری کی چینی ہم منصب سے ملاقات

امریکا کے شہر نیو یارک میں وزیرِ خارجہ بلاول بھٹو زرداری نے اقوامِ متحدہ کی جنرل اسمبلی کے اجلاس میں شرکت سے قبل چینی ہم منصب وانگ ژی سے ملاقات کی ہے جس میں پاک چین تعلقات سمیت اہم امور پر گفتگو ہوئی۔

تفصیلات کے مطابق وزیر خارجہ بلاول بھٹو زرداری نے جنرل اسمبلی کے 77ویں اجلاس سے قبل چینی ہم منصے سے ملاقات کی جس کے دوران باہمی شراکت داری اور دو طرفہ تعاون سمیت باہمی دلچسپی کے امور  زیرِ غور آئے۔

یہ بھی پڑھیں:

وزیر اعظم اقوامِ متحدہ کے اجلاس میں شرکت کیلئے نیویارک پہنچ گئے

وزیر خارجہ بلاول بھٹو زرداری نے پاکستانی سیلاب زدگان کی بھرپور حمایت، مدد اور تعاون پر ہمسایہ ملک چین کے ہم منصب کا شکریہ ادا کیا۔ وزیر خارجہ نے ناروے اور امریکا کے حکام سے بھی ملاقاتیں کیں۔

ناروے کی ہم منصب اور امریکی نمائندۂ خصوصی برائے افغان مفاہمتی عمل ٹام ویسٹ سے ملاقات کے دوران وزیر خارجہ نے پاکستان کا مؤقف دونوں رہنماؤں کے سامنے رکھا۔ قبل ازیں وزیر خارجہ نے او آئی سی رابطہ گروپ کے اجلاس سے خطاب بھی کیا۔

دنیا بھر میں مسلمانوں کے خلاف بڑھتی ہوئی نفرت کے تناظر میں وزیر خارجہ کا خطاب اہم رہا۔خطاب کے دوران وزیر خارجہ بلاول بھٹو زرداری نے اسلاموفوبیا سے نمٹنے کیلئے اقوامِ متحدہ میں ایک مندوب کے تقرر کا مطالبہ بھی کیا۔