ن لیگ اور پی پی میں بادشاہت کا کلچر، پی ٹی آئی نے قبضہ ختم کرایا، فواد چوہدری

ایبٹ آباد:وفاقی وزیر اطلاعات فواد چوہدری نے کہا ہے کہ آزاد کشمیر میں بھی تحریک انصاف کی حکومت ہوگی ،بلاول اور مریم کو کشمیر کی تاریخ کا بھی نہیں پتا،جنہوں نے کبھی اپنے ہاتھ سے ایک روپیہ نہیں کمایا وہ ملکی معیشت کیا چلائیں گے۔

ہفتہ کو تحریک انصاف کے ورکرز سے خطاب کرتے ہوئے انہوں نے کہاکہ سونے کا چمچہ منہ میں لے کر دونوں بچے اپنے ابوؤں کی کرپشن بچانے نکلے ہیں، دونوں جماعتوں میں جمہوریت کے بجائے بادشاہت کا کلچر ہے،سابق وزرائے اعظم بلاول بھٹو زر داری اور مریم کے آگے ہاتھ باندھ کر کھڑے ہوتے ہیں۔

مزید پڑھیں: میں نے بے نقاب کیا تو وزیر اعظم فیاض چوہان کو پی ٹی آئی سے نکال دینگے۔حریم شاہ

انہوں نے کہاکہ پاکستان کو ایک نئی منزل سے روشناس کرانا ہے ،آزاد کشمیر میں بھی تحریک انصاف کی حکومت ہوگی،پی ٹی آئی نے ملک سے ن لیگ اور پیپلز پارٹی کے قبضے کا خاتمہ کیا ہے۔

وزیر اطلاعات نے کہاکہ دونوں جماعتوں میں جمہوریت کے بجائے بادشاہت کا کلچر ہے۔ انہوں نے کہاکہ جب معلوم ہوا کہ کرکٹ سیزیز کے نشریاتی حقوق بھارتی کمپنی کے پاس ہیں تو ہم نے کسی بھی بھارتی کمپنی سے کاروبارنہ کرنیکا فیصلہ کیا،انہوں نے کہاکہ ہم نے معاشی قربانیاں بھی دی ہیں ،ہم نے جان کی بھی قربانیاں دی ہیں ۔

وزیر اطلاعات نے کہاکہ وزیراعظم عمران خان نے دیوالیہ ہونے والی پاکستانی معیشت کو سنبھالا۔ وزیر اطلاعات نے ایک بار پھر مریم نواز اور بلاول بھٹو زر داری پر تنقید کرتے ہوئے کہاکہ دونوں نے کبھی پرائیویٹ ٹرانسپورٹ پر سفر نہیں کیا، ان لوگوں کو عوام کے مسائل کا علم نہیں ہے ، غریب عوام کی پارٹی تحریک انصاف ہے۔