گوگل نیوز پر ہمیں فالو کریںکراچی میں بولی وڈ کے دبنگ ہیرو سلمان خان کے قریبی خاندانی تعلقات ہونے کا دعویٰ کرنے والا ایک خاندان سامنے آیا ہے، جس کی ویڈیو سوشل میڈیا پر وائرل ہوگئی ہے۔
نجی ٹی وی چینل کی رپورٹ کے مطابق، خود کو “باری ماموں” کہلانے والے ایک بزرگ شہری نے دعویٰ کیا ہے کہ سلمان خان کے والد، سلیم خان، ان کے پھوپھی زاد بھائی ہیں۔
باری ماموں نے بتایا کہ تقسیم ہند کے دوران ان کا خاندان ریاست اندور سے کراچی منتقل ہوا، جبکہ سلمان خان کے دادا اور والد اندور ہی میں رہے، جہاں وہ پولیس کے اعلیٰ عہدوں پر فائز تھے۔
انہوں نے مزید وضاحت کی کہ سلمان خان کے دادا نے ان کی پھوپھی سے شادی کی تھی، اور یہی تعلق دونوں خاندانوں کو جوڑتا ہے۔ باری ماموں نے یہ بھی بتایا کہ ان کا اور سلیم خان کا ایک دوسرے سے رابطہ برقرار ہے، اور دونوں ماضی میں متعدد بار ملاقات بھی کر چکے ہیں۔
باری ماموں کے بیٹے کے مطابق، 1980 کی دہائی میں سلمان خان اپنے بھائیوں ارباز خان اور سہیل خان کے ساتھ کراچی آئے تھے۔ اس دوران ارباز خان کا موٹر سائیکل حادثہ ہوا، جس کی وجہ سے وہ تین ماہ تک کراچی میں رہے۔
انہوں نے یہ انکشاف بھی کیا کہ اس وقت سلمان خان اداکار نہیں تھے اور لائٹ ہاؤس مارکیٹ سے جینز خرید کر بھارت لے گئے تھے۔
باری ماموں کے مطابق، وہ سلمان خان کے ممبئی والے گھر میں بھی ٹھہر چکے ہیں اور دبئی میں بھی ان سے ملاقات کر چکے ہیں۔
سلمان خان کے خاندان ہونے کا دعویٰ کرنے والی ویڈیو سوشل میڈیا پر وائرل ہوگئی ہے، اور صارفین نے اس پر دلچسپ تبصرے کیے ہیں۔ کچھ صارفین نے اسے دلکش کہانی قرار دیا، جبکہ کچھ نے اسے حقیقت جاننے کا اشتیاق ظاہر کیا۔
