پاکستان بھر میں آج عید الاضحی مذہبی جوش و جذبے کے ساتھ منائی جارہی ہے

کراچی: حضرت ابراہیم ؑکی عظیم قربانی کی یاد میں آج پورے ملک میں عیدالاضحی مذہبی جوش و جذبے اور عقیدت و احترام کے ساتھ منائی جارہی ہے۔

آج کے دن کا آغازمساجد میں امت کی فلاح و بہبود اور ترقی ، خوشحالی اور ملک کی سلامتی کے لئے خصوصی دعاؤں کے ساتھ ہوا۔

ملک بھر کے تمام شہروں ، قصبوں اور دیہاتوں میں مساجد ، عید گاہوں اور کھلی جگہوں پر عید کے بڑے بڑے اجتماعات کا انعقاد کیا گیا۔

اپنے عید کے خطبوں میں ، علمائے کرام نے حضرت ابراہیم ؑکی عظیم قربانی کی اہمیت پر روشنی ڈالی۔اسلام آباد میں عید کامرکزی اجتماع فیصل مسجد میں منعقد ہوا۔

لاہور میں عید کی مرکزی جماعت بادشاہی مسجد میں منعقد ہوئی جہاں لوگوں کی ایک بڑی تعداد نے نماز عید ادا کی اوراس کی قیادت خطیب مولانا سلطان الحق نے کی۔

کراچی میں بڑی تعداد میں لوگوں نے کورونا کے پھیلاؤ کو محدود کرنے کے لئے معیاری آپریٹنگ طریقہ کار پر عمل کرکے 2 ہزار سے زائد عیدگاہوں ، مساجد ، امام بارگاہوں ، پارکوں اور کھلی جگہوں پر نماز عید ادا کی۔

عید کی نماز کے بعد مسلمانوں نے جانوروں کی قربانی کی رسم ادا کرنا شروع کی ، خاندان اور دوستوں کے ساتھ کھانا کھایا اور اپنے کنبہ کے افراد ، دوستوں اور غریبوں میں قربانی کا گوشت بانٹنا شروع کردیا۔

مزید پڑھیں: عید الاضحی :مذہبی فریضہ اور ذمہ داری