پاکستان آکر خوش ہوں، کوشش ہوگی کہ پشاور زلمی پی ایس ایل کا ٹائل جیتے،ثاقب محمود

کراچی: انگلینڈ کرکٹ ٹیم کے فاسٹ باؤلر پاکستانی نژاد ثاقب محمود کا کہنا ہے کہ دس سال بعد پاکستان آکر بہت خوشی محسوس ہورہی ہے، پشاور زلمی کو پی ایس ایل کا ٹائٹل جتوانا چاہتا ہوں۔

ایک انٹرویو کے دوران ثاقب محمود نے کہا کہ پاکستان میں ان کی فیملی کا تعلق اٹک سے ہے اور ان کی فیملی کے بیشتر اراکین پشاور زلمی کے سپورٹرز ہیں،دس سال بعد پاکستان آیا اور پشاور زلمی کا حصہ بن کر خوش ہوں۔

ثاقب محمود کا کہنا تھا کہ پشاور زلمی اور پاکستان سپر لیگ کے بارے میں انگلینڈ کے کھلاڑیوں لیام ڈاسن، کرس جارڈن، ٹام بین ٹن اور دیگر نے کافی کچھ بتایا اور واقعی پشاور زلمی ٹیم ایک زبردست گروپ جہاں سب ایک فیملی کی طرح ہیں۔

ثاقب محمود نے کہا کہ وہ جانتے ہیں کہ بہت سے پاکستانی فینز نے انہیں باؤلنگ کرتے نہیں دیکھا ہوگا،انہوں نے کہا کہ میں چاہتا ہوں کہ اپنی باؤلنگ سے پشاور زلمی کو ٹائٹل جتواؤں اور اس موقع کویادگار بناؤں۔

انہوں نے کہا کہ پشاور زلمی میں شامل وہاب ریاض اور حسن علی بہترین فاسٹ باؤلر ہیں، ہمارے دونوں پریکٹس سیشنز شاندار رہے،حیدر علی بہترین نوجوان کرکٹر ہے،ان سب کے ساتھ کھیل کر اچھا تجربہ حاصل ہوگا۔