کورونا وائرس :عوام کومشتبہ افراد سے خون لینے سے گریز کرنیکا مشورہ

کراچی: سیکریٹری سندھ بلڈ ٹرانسفیوژن اتھارٹی (ایس بی ٹی اے) ڈاکٹر در ناز جمال قاضی نے صحت کی خدمات سے متعلق کارکنوں پر زور دیا ہے کہ وہ کورونا وائرس کے مشتبہ افراد سے خون لینے سے گریز کریں۔

ڈاکٹر در ناز نے کہا کہ کورونا وائرس کسی مریض کے متاثرہ خون کے ذریعے صحت مند فرد میں پھیل سکتا ہے،انہوں نے کہا کہ ایسا ہی ایک معاملہ بیرون ملک بھی ہوا ہے۔

انہوں نے کہا کہ خون کا عطیہ صرف رجسٹرڈ بلڈ بینکوں کے ذریعہ صحت مند افراد سے کیا جانا چاہئے۔

انہوں نے بتایا کہ ایس بی ٹی اے نے صوبے کے بڑے اسپتالوں کے احاطے میں رجسٹرڈ بلڈ بینکوں کی فہرستیں نمایاں کی ہیں اور جن لوگوں کو خون کی ضرورت ہے وہ پہلے اس فہرست کی جانچ کریں۔

مزید پڑھیں: میڈیکل سائنس میں انقلاب: بلڈ ٹیسٹ کے لیے خون نکالنے والا روبوٹ تیار

انہوں نے کہا کہ ایس بی ٹی اے نے رجسٹرڈ بلڈ بینکوں کو بھی ہدایت نامہ جاری کیا ہے کہ وہ اس سرٹیفکیٹ کو ایک نمایاں جگہ پر رکھیں۔

انہوں نے کہا کہ کوئی بھی صحتمند فرد تین ماہ میں ایک بار خون عطیہ کرسکتا ہے۔ اگر زیادہ باقاعدہ نہیں تو ہر ایک کو کم سے کم اپنی سالگرہ پر قوم کو تحفہ کے طور پر خون کا عطیہ کرنا چاہئے۔انہوں نے بتایا کہ ایک خون کا عطیہ تین جانیں بچا سکتا ہے۔