ڈائمنڈ جوبلی کی تقریبات کا آغاز 23 مارچ کی پریڈ سے ہو گا، فواد چوہدری

اسلام آباد :وفاقی وزیر اطلاعات و نشریات فواد چوہدری نے کہا ہے کہ ملک کی آزادی کا 75 واں سال ہے، اس سال تمام ادارے شاندار تقریبات کا انعقاد کریں گے، ڈائمنڈ جوبلی کی تقریبات کا آغاز 23 مارچ کی پریڈ سے ہو گا۔

ان خیالات کا اظہار انہوں نے پاکستان کی ڈائمنڈ جوبلی کے لوگو کی تقریب رونمائی سے خطاب کرتے ہوئے کیا۔ وزیر اطلاعات و نشریات نے کہا کہ رواں سال تمام ادارے شاندار تقریبات کا انعقاد کریں گے، ڈائمنڈ جوبلی کی تقریبات کا آغاز 23 مارچ کی پریڈ سے ہو گا اور 14 اگست کو بھی اہم تقریبات منعقد کی جائیں گی۔

انہوں نے کہا کہ یوم پاکستان 23 مارچ کی پریڈ خصوصی پریڈ ہو گی جس میں اسلامی ممالک کے وزرائے خارجہ کے علاوہ بعض یورپی ممالک کے وزرائے خارجہ اور اہم نمائندے شرکت کر رہے ہیں،ہماری کو شش ہو گی کہ ہم اپنی تاریخ کی تمام شاندار کہانیوں کو سامنے لائیں۔

مزید پڑھیں:صدر عارف علوی نے 75ویں یوم آزادی کے لوگو کی نقاب کشائی کردی

انہوں نے کہا کہ پاکستان کی آزادی کا 75 واں سال ہے اور وزارت اطلاعات و نشریات کو ٹاسک دیا گیا تھا کہ ڈائمنڈ جوبلی کی تقریبات کا چارٹ تشکیل دیا جائے جس میں وزارت اطلاعات و نشریات کے تمام شعبوں اور تمام وزارتوں اور محکموں نے اپنا کردار ادا کیا اورجامع پروگرام تشکیل دیئے ہیں جن کا آغاز 23 مارچ سے کیا جائے گا۔

وفاقی وزیر نے کہا کہ پاکستان ٹیلی ویڑن اوردیگر چینلز اور تمام اداروں نے اپنے زبردست پروگرام ترتیب دیئے ہیں اور اس سال ہم 23 مارچ کو اس انداز میں منانے جا رہے ہیں جس کی تاریخ میں مثال نہیں ملتی۔

انہوں نے کہا کہ قیام پاکستان سے اب تک کی کہانی جو شاندار کہانی ہے اسے یادگار بنانے کی کوشش کریں گے۔

انہوں نے کہا کہ امید ہے کہ یہ سفر شاندار ہو گا، پاکستان کی یہ تقریب مستقبل کا پیش خیمہ ہو گی اور ہم اس میں مزید اضافہ کریں گے۔