گوگل نیوز پر ہمیں فالو کریںاسلام آباد:الیکشن کمیشن کے اراکین کی تقرری کے معاملے پر پارلیمانی کمیٹی کا اجلاس مختصر کاروائی کے بعد ملتوی ہوگیا ،پارلیمانی کمیٹی کا آئندہ اجلاس اگلے ہفتے ہو گا جس میں چیف الیکشن کمشنر سمیت سندھ اور بلوچستان کے ممبران کی تقرری کا معاملہ زیر غور آئے گا۔
الیکشن کمیشن کے اراکین کی تقرری کیلئے اجلاس بدھ کو چیئر پرسن شیریں مزاری کی زیر صدارت دوبارہ ہوا جو بے نتیجہ ختم ہوگیا اجلاس میں سندھ اور بلوچستان سے اراکین کے ناموں پر اتفاق نہ ہو سکا ۔
شیزہ فاطمہ نے بتایاکہ ہم نے اتفاق سے فیصلہ کیا ہے کہ الیکشن کمیشن کے اراکین اور چیف کا فیصلہ اکٹھے کیا جائے،اگلے ہفتے دوبارہ پارلیمانی کمیٹی کا اجلاس طلب کیا جائے گا۔ انہوں نے کہاکہ الیکشن کمیشن کو ڈس فنکشنل ہونے سے بچانے کے لئے عدالت سے ایک سے دو ہفتوں کی توسیع مانگی جائے گی۔
پاکستان پیپلز پارٹی کے راجہ پرویز اشرف نے بتایاکہ الیکشن کمیشن اہم ترین ادارہ ہے ہماری کوشش ہے اس میں میرٹ پر اور اچھے لوگ آئیں،ایسے ممبران آئیں جن پر کوئی انگلی نہ اٹھاسکے،حکومت سے بھی یہی گزارش کی ہے کہ بہتر لوگ لائے جائیں،جو نام آئے ہیں ان پر اتفاق قائم کرنے میں وقت لگے گا۔
مشاہد اللہ خان نے کہاکہ اپوزیشن ہمیشہ ذمہ داری کا مظاہرہ کرتی ہے،اب ہم سپریم کورٹ نہیں جائیں گے۔ انہوں نے کہاکہ چیف الیکشن کمشنر کا تقرر فوری کیا جائے، قائمقام والی بات ٹھیک نہیں ہے، تین بندے ہوں گے تو الیکشن کمیشن فعال رہے گا ۔
یہ بھی پڑھیں: شاہد خاقان عباسی، آصف زرداری، خورشید شاہ اور خواجہ سعد رفیق کےپروڈکشن آرڈر جاری
