سندھ کے سرکاری ہیلتھ سینٹر میں حاملہ خاتون پر بد ترین ظلم

سندھ کے علاقے تھر پارکر کے چھاچھرو رورل ہیلتھ سینٹر میں غریب حاملہ خاتون ظلم کا بدترین واقعہ سامنے آیا ہے۔

مقامی ذرائع کے مطابق خاتون کے پیٹ میں موجود بچے کو اس کا سر کاٹ کر ماں کے پیٹ سے نکالا گیا اور دھڑ پیٹ میں ہی چھوڑ دیا گیا۔

محکمۂ صحت سندھ کے حکام کے مطابق مذکورہ خاتون کو چھاچھرو سے سول اسپتال مٹھی بھیجا گیا جہاں پر کوئی سہولت موجود نہیں تھی۔

مٹھی سے حاملہ خاتون کو سول اسپتال حیدرآباد لایا گیا، جہاں خاتون کے پیٹ سے بچے کا باقی ماندہ دھڑ نکال کر خاتون کی جان بچائی گئی۔

ڈائریکٹر جنرل ہیلتھ سندھ ڈاکٹر جمن کا اس حوالے سے کہنا ہے کہ اس اندوہناک اور سفاکانہ واقعے کی تحقیقات کا حکم دے دیا ہے۔

ان کا یہ بھی کہنا ہے کہ اس سفاکی میں ملوث افراد کے خلاف سخت کارروائی کی جائے گی۔