عدالت کا حمزہ شہباز سے حلف لینے کیلئے خود نمائندہ مقرر کرنے کا عندیہ

لاہور:عدالت نے نومنتخب وزیراعلیٰ پنجاب حمزہ شہباز سے حلف لینے کیلئے خود نمائندہ مقرر کرنے کا عندیہ دیدیا ہے۔

چیف جسٹس لاہور ہائی کورٹ محمد امیر بھٹی نے نومنتخب وزیراعلیٰ پنجاب حمزہ شہباز کی جانب سے حلف برداری سے متعلق دائر درخواست کی سماعت کی۔

حمزہ شہباز نے اپنی درخواست میں موقف اختیار کیا ہے کہ لاہور ہائیکورٹ نے صدر کووزارت اعلیٰ کے حلف کے لیے گورنر کے علاوہ کسی اور شخص کو مقرر کریں  تا    ہم  انہوں نے عدالتی احکامات پر عمل درآمد نہیں کیا۔

حمزہ شہباز نے عدالت سے اپنے احکامات پر عملدرآمد کے لیے ہدایات جاری کرنے کی استدعا کی ۔

مزید پڑھیں:صدر مملکت کو حمزہ شہباز سے حلف لینے کیلئے نمائندہ مقرر کرنیکا حکم

یاد رہے کہ گورنر پنجاب عمر سرفراز چیمہ کی جانب سے آئینی حکم پر عمل کرنے سے انکار کے بعد22 اپریل کو لاہور ہائیکورٹ نے مختصر فیصلہ سناتے ہوئے صدر مملکت کو نومنتخب وزیر اعلیٰ پنجاب حمزہ شہباز سے حلف لینے کیلئے کوئی اور نمائندہ مقرر کرنے کا حکم دیاتھا۔

چیف جسٹس امیر بھٹی نے کہا کہ 21 دنوں سے پنجاب میں حکومت نہیں ہے، آپ کو اندازہ ہے صوبہ کیسے چل رہا ہے ؟ یہ الیکشن بھی جیسے ہوا سب کورٹ کے علم میں ہے، عدالت کے حکم پر چیف منسٹر کا الیکشن ہوا، جس طرح سے چیف منسٹر کے الیکشن میں تاخیری حربے استعمال کیے گئے سب پتہ ہے۔