عدالت نے گوجرانوالہ جلسہ کیس میں خرم دستگیر کی عبوری ضمانت منظور کرلی

گوجرانوالہ :سیشن عدالت نے پاکستان ڈیموکریٹک موومنٹ کے جلسے کے دوران حکومتی امور میں مداخلت سے متعلق کیس میں پاکستان مسلم لیگ ن کے رہنما خرم دستگیر کی عبوری ضمانت منظور کرلی۔

گوجرانوالہ جلسے کے انعقاد کے سلسلے میں پی ڈی ایم انتظامیہ کے خلاف تین الگ الگ مقدمات درج کیے گئے تھے۔عدالت نے 26 اکتوبر تک مسلم لیگ (ن) کے رہنما کو گرفتار نہ کرنے کی ہدایت کی ہے اور کیس کا مکمل ریکارڈ طلب کرلیا ہے۔

پہلا مقدمہ ریلی کے دوران کورونا وائرس معیاری آپریٹنگ طریقہ کار کی خلاف ورزی کرنے پر درج کیا گیا تھا۔ ایف آئی آر میں مسلم لیگ ن کے رہنماؤں خرم دستگیر خان ، محمود رشید ورک اور سلمان خالد بٹ کو نامزد کیا گیا تھاجبکہ مقدمے میں ایس او پیز کی خلاف ورزی اور سڑکوں کو روکنے سے متعلق دفعات شامل کی گئیں۔

اس کے علاوہ مریم نواز ، کیپٹن (ر) صفدر ، پرویز ملک ، ملک ریاض ، سیف الملوک اور دیگر کیخلاف مقدمہ میں شاہدرہ پولیس اسٹیشن میں پنجاب ساؤنڈ ایکٹ کے تحت شکایت درج کی گئی تھی۔

مزید پڑھیں:مریم نوازکی بلوچ طلبہ کے احتجاج میں شرکت، حکومت پر کڑی تنقید

ایک اور کیس میں مسلم لیگ (ن) کے رہنما خرم دستگیر خان، عمران خالد اور سلمان خالد کو اقدام قتل ، سرکاری امور میں مداخلت اور عوامی املاک کو تباہ کرنے کی دفعات کے تحت نامزد کیا گیا تھا۔