گوگل نیوز پر ہمیں فالو کریںاسلام آباد: وفاقی وزیر اطلاعات و نشریات شبلی فراز نے کہا ہے کہ حکومت کی موثر پالیسیوں کی وجہ سے ملک معاشی استحکام کی طرف گامزن ہے۔
منگل کووفاقی کابینہ کے اجلاس کے بعد میڈیا کو بریفنگ دیتے ہوئے شبلی فراز نے کہا کہ معاشی حالات بہتر ہونے کی وجہ سے اسٹاک مارکیٹوں میں استحکام دیکھا جا رہا ہے۔
ان کا مزید کہنا تھا کہ مشیر مالیات نے موجودہ معاشی حالات پر تفصیلی بریفنگ دی ۔ وفاقی وزیر نے کہا کہ معیشت درست سمت کی طرف جارہی ہے جبکہ ملک میں برآمدات میں اضافہ ہوا ہے۔
شبلی فراز نے کہا کہ اسٹیٹ بینک کے ذخائر 12اعشاریہ 5 بلین ڈالر تک جا چکے ہیں جو خوش آئند علامت ہے۔
انہوں نے مزید کہا کہ جب تحریک انصاف کی حکومت اقتدار میں آئی تو موجودہ کھاتوں کا خسارہ 20 ارب ڈالر تھا جبکہ اب یہ 3 ارب ڈالر رہ گیا ہے۔
شبلی فراز نے بتایا کہ میڈیا کے 80 فیصد واجبات کی ادائیگی کی جاچکی ہے جبکہ وزیر اعظم نے بقایا واجبات فوری ادا کرنے کی ہدایت کی ہے۔
مزید پڑھیں:کورکمانڈر کانفرنس، آرمی چیف نے افغان مفاہمتی عمل میں پیشرفت کو سراہا
