کراچی : تنظیم الاعوان پاکستان کے مرکزی رہنماء زاہد اعوان نے کہا ہے کہ حکومت نے تاجروں کو اعتماد میں لیئے بغیر لاک ڈاؤن 30 اپریل تک بڑھا کر تاجروں کے مسائل مزید بڑھادیے ہیں، وباء سے بچاؤ کیلئے اقدامات کا قدر ہیں لیکن غریبوں کی داد رسی بھی ضروری ہے ۔
تنظیم الاعوان کے اجلاس سے خطاب کرتے ہوئے زاہد اعوان نے کہا کہ کورونا کی وجہ سے پاکستان کی معیشت کا بھٹہ بیٹھ گیا ہے، پورے ملک میں لاک ڈاؤن کی وجہ سے تجارتی سرگرمیاں منجمد ہوچکی ہیں، کاروباری طبقے کے ساتھ تمام طبقات لاک ڈاؤن کی وجہ سے بری طرح متاثر ہوئے ہیں۔
تمام صوبوں نے منصوبہ بندی کے بغیر لاک ڈاؤن کرکے غریبوں کو بھوک سے مرنے کیلئے چھوڑدیا ہے۔
وفاق کی جانب سے کنسٹرکشن سیکٹر کیلئے مراعات اور صنعت کا درجہ دیکر کام کی اجازت دینا خوش آئند اقدام ہے، جس فیصلے سے لوگوں کو روزگار ملے ہم ہر اس فیصلے کی حمایت کرینگے تاہم حکومت لاک ڈاؤن کی وجہ سے متاثر ہونیوالے عوام کو امداد کی فراہمی کیلئے عملی اقدامات کرے۔
انہوں نے کہا کہ لاک ڈاؤن کی وجہ سے چھوٹے کاروبار کرنیوالوں کے گھروں میں فاقے ہورہے ہیں، لوگوں کے پاس دکانوں اور گھروں کے کرائے دینے اور یوٹیلیٹی بلز کیلئے بھی پیسے نہیں ہیں۔
مزید پڑھیں: کراچی میں آن لائن خرید و فروخت میں جعلسازی کا انکشاف، موبائل فون ڈیلرلٹ گیا