کورونا نے مزید 82 زندگیاں چھین لیں، 3480 نئے شکار

اسلام آباد:پاکستان میں کورونا وائرس کی وجہ سے اموات کا سلسلہ جاری، موذی وباء نے مزید 82 زندگیاں چھین کر 3480 شہریوں کو نیا شکار بنالیا۔

این سی او سی کے مطابق گزشتہ 24 گھنٹوں کے دوران 63 ہزار 181 ٹیسٹ کئے گئے جن میں سے 3480 کیسز مثبت آئے جبکہ ملک میں کورونا کیسز کی شرح 5اعشاریہ 55 فیصد ریکارڈ کی گئی۔

نیشنل کمانڈ اینڈ کنٹرول سینٹر کے اعداد و شمار کے مطابق گزشتہ 24 گھنٹوں میں کورونا کا شکار 82 افراد اپنی زندگیوں سے محروم ہوگئے۔

Statistics 11 Sep 21:
Total Tests in Last 24 Hours: 63,181
Positive Cases: 3480
Positivity % : 5.50%
Deaths : 82
Patients on Critical Care: 5373

— NCOC (@OfficialNcoc) September 11, 2021

واضح رہے کہ کورونا کے بڑھتے کیسز کے پیش نظر کورنگی کے ہاٹ اسپاٹ علاقوں میں اسمارٹ لاک ڈاؤن نافذ کردیا گیاہے، اسمارٹ لاک ڈاؤن2ہفتے کیلئے 23ستمبر تک نافذ العمل ہوگا۔

ڈپٹی کمشنر کورنگی نے ہاٹ اسپاٹ ایریاز کی نشاندہی کے بعد کورنگی کے مخصوص علاقے اور گلیوں میں اسمارٹ لاک ڈائون نافذ کردیا، اسمارٹ لاک ڈائون کا نفاذ دوہفتوں کے لیے 23ستمبر تک نافذالعمل رہے گا۔

کورنگی کے علاقے یوسی دس اور ماڈل کالونی یو سی ایک میں کیسز رپورٹ ہوئے، ڈی سی کورنگی نے بتایا کہ دو یوسیز میں 13 کورونا کیسز رپورٹ سامنے آنے کے بعد لاک ڈائون نافذکیا گیا ہے۔

مزید پڑھیں:دُنیا بھر میں کورونا سے 22کروڑ 41لاکھ افراد متاثر، 46لاکھ 22ہزار ہلاک

ڈسٹرکٹ کورنگی کے سب ڈویژن کورنگی کے یونین کونسل نمبر 10 اور ماڈل سب ڈویژن کی یونین کونسل نمبر 1 میں مائیکرواسمارٹ بھی لاک ڈاؤن نافذ کیا گیا۔

لاک ڈاؤن ہاٹ اسپاٹ علاقوں میں ڈسٹرکٹ ہیلتھ آفیسر کی رپورٹ کے مطابق لگایا گیا ہے۔نوٹیفکیشن میں کہا گیا ہے کہ مائیکرو اسمارٹ لاک ڈاؤن والے ایریاز میں کسی بھی قسم کی اجتماعات اور تقریبات پر مکمل پابندی ہوگی اور ہاٹ اسپاٹ ایریاز میں ایس او پیز پر سختی عملدرآمد کروایا جائے گا۔

نوٹیفیکیشن کے مطابق مائیکرو اسمارٹ لاک ڈاؤن والے ایریاز میں ماسک کا استعمال لازمی قرار دیتے ہوئے کہا گیا ہے کہ اسسٹنٹ کمشنر کورنگی اور اسسٹنٹ کمشنر ماڈل اپنے اپنے سب ڈویژن میں اسمارٹ لاک ڈاون والے علاقے میں ایس او پیز کو لازمی فالو کروائیں۔