چیف جسٹس کا پولیس کے افسران و جوانوں کی ڈگریوں کی تصدیق کروانے کا حکم

اسلام آباد :چیف جسٹس آف پاکستان اورچیئرمین لاء اینڈ جسٹس کمیشن آف پاکستان جسٹس گلزار احمد نے تمام پولیس کے تمام انسپکٹر جنرلز کو ہدایت کی کہ وہ پوری پولیس فورس کی ڈگریوں اور اسنادکی تصدیق کریں۔

چیف جسٹس گلزار احمد نے سپریم کورٹ میں منعقدہ پولیس ریفارمز کمیٹی کے اجلاس کی صدارت کرتے ہوئے کہا کہ سادہ فوجداری مقدمات کو دہشت گردی کے معاملات کی طرح سمجھنے کی حوصلہ شکنی کے لئے سپریم کورٹ کے فیصلے میں جو اصول وضع کیا گیا ہے اس پر عمل کیا جانا چاہئے جس کے تحت تفتیشی ایجنسیوں کے ساتھ ساتھ استغاثہ اور عدلیہ کی رہنمائی کے لئے دہشت گردی کی عمدہ تعریف کی گئی ہے۔

انہوں نے ڈی جی این پی بی کو بھی ہدایت کی کہ وہ مختلف جرائم کی خصوصی تفتیش کے لئے قابل تفتیشی افسران کی فہرست تیار کریں۔ انہوں نے مشاہدہ کیا کہ پولیس عہدیداروں کے منفی رویے کی وجہ سے معاشرے میں قائم ہونے والی منفی شبیہ پر غور کرنے کی ضرورت ہے کیونکہ پولیس اہلکاروں کا مثبت رویہ اتنا ہی ضروری ہے جتنا عام افراد اور عام لوگوں کے حقوق کے تحفظ کے لئے ان کی اہلیت ضروری ہے۔

چیف جسٹس نے کہا کہ پولیس فورس کی غیرجانبداری کو یقینی بنانا اور محکمہ پولیس پر غیر مناسب اثر و رسوخ کو ختم کرنے کے لئے یہ ضروری ہے کہ پولیس افسران / عہدیداروں کی تعیناتی اور تبادلہ کرنے کی طاقت متعلقہ آئی جی پی کو تفویض کی جائے۔

مزید پڑھیں:سینیٹ ووٹ کو خفیہ رکھنا جرم کی حوصلہ افزائی کے برابر ہے،سپریم کورٹ

آئی جی پی پنجاب نے کمیٹی کو بتایا کہ گاڑیوں کی خریداری پر پابندی آپریشنل گاڑیوں کی خریداری میں رکاوٹیں پیدا کررہی ہے جس کے باعث پولیس افسران کواپنے فرائض کی انجام دہی میں مشکلات درپیش ہیں ۔

اس پر چیف جسٹس نے کہاکہ پابندی آپریشنل گاڑیوں پر نہیں لگژری گاڑیوں کی خریداری پر عائد کی گئی ہے تاہم سرکاری گاڑیوں کے غلط استعمال پر نظر ڈالی جانی چاہئے۔