وسط مدتی انتخابات کے حالات پیدا ہورہے ہیں تو ہم ان کی حمایت کریں گے، سید مصطفیٰ کمال

حیدرآباد: پاک سرزمین پارٹی کے چیئرمین سید مصطفیٰ کمال نے کہا ہے کہ وسط مدتی انتخابات کے حالات پیدا ہو رہے ہیں تو ہم ان کی حمایت کریں گے ، معاشی ابتری تیزی سے بڑھ رہی ہے مگر حکمرانوں کو ادراک نہیں ۔

حیدرآباد میں میڈیا سے گفتگو کر تےہوئےمصطفیٰ کمال نے کہا کہ اگر مڈٹرم الیکشن کے حالات پیدا ہوتے ہیں تو پی ایس پی اس کی پوری طرح حمایت کرے گی جن پارٹیوں کو مقبولیت کا زعم ہے نئے انتخابات میں انہیں اپنی مقبولیت کا پتہ چل جا ئے گا۔

انہوں نے کہا کہ ملک میں معاشی صورتحال انتہائی خراب ہے اور مستقبل قریب مزید خراب نظر ا ٓرہا ہے،حکمرانوں کو معاشی صورتحال کی خرابی کی شدت کا اندازہ نہیں اس لئے معاملات روزبروز بدتر ہوتے جارہے ہیں۔

مصطفیٰ کمال نے کہا کہ سندھ میں ہر شعبہ ابتری کا شکار ہے، کتے کے کاٹے کی ویکسین تک دستیاب نہیں، سندھ میں کتے کے کاٹنے سے 35 اموات ہو چکی ہیں جو ہولناک امر ہے ۔

انہوں نے کہا کہ گذشتہ دنوں رحیم یار خان میں پیش آنے والے سانحہ تیزگام ایکسپریس میں لاپتہ 8 افراد کے لواحقین ٹھوکریں کھا رہے ہیں لیکن انہیں اب تک اپنے پیاروں کی لاشوں کا پتہ نہیں چل سکا ،انتظامیہ لواحقین سے بدتر سلوکی کررہی ہے۔

مزید پڑھیں: پی آئی سی حملہ کیس،گرفتار 46وکلاء کے جسمانی ریمانڈ کی استدعا مسترد ،14روزہ جوڈیشل ریمانڈ پر جیل منتقل

انہوں نے مطالبہ کیا کہ سانحہ تیزگام میں میر پور خاص کے لاپتہ افراد کے مسئلہ کو انسانی ہمدردی کی بنیاد پر حل کیا جائے حکومت پاکستان اور ریلوے کے اعلیٰ حکام ان کے لواحقین کے کرب کو محسوس کریں اور میتوں کا پتہ چلایا جائے ۔

مصطفیٰ کمال نے کہا کہ میں عوام کے مفادات اور مسائل کے لئے آواز اٹھاتا رہوں گا ، حیدرآباد اور معاشی حب کراچی میں مردم شماری میں ان شہروں کی آبادی کو کم شمار کیا گیا ہے ۔

کراچی کے تو 70 لاکھ لوگوں کا تو شمار ہی نہیں گیا جس کا اعتراف وزیر اعلیٰ نے بھی کیا ہے مگر اس کا سدباب نہیں کیا گیا ہے ،پی ایس پی اس مسئلہ پر سپریم کورٹ بھی گئی ہے۔