چیئرمین نیب جسٹس جاوید اقبال کی نیب ہیڈکوارٹرز میں کھلی کچہری

اسلام آباد: قومی احتساب بیورو (نیب)کے چیئرمین جسٹس جاوید اقبال نے نیب ہیڈکوارٹرز میں جمعرات کوکھلی کچہری میں ملک بھر سے آئے ہوئے عوام کی بدعنوانی، فراڈ، مضاربہ،مشارکہ، جعلی ہاؤسنگ کو آپریٹوسوسائٹیوںاور منی لانڈرنگ وغیرہ سے متعلق شکایات سنیں۔

 چیئرمین نیب جسٹس جاوید اقبال نے نیب ہیڈکوارٹرز اسلام آباد میں منعقدہ کھلی کچہری میں ملک بھر سے آئے ہوئے عوام کی شکایات انتہائی اطمینان اور تسلی کے ساتھ سنیں بلکہ ان کے ازالہ کیلئے قانون کے مطابق احکامات صادر کئے۔

شکایات کنندگان نے چیئرمین نیب جسٹس جاوید اقبال کی بدعنوانی سے متعلق ان کی شکایات کے حل کے لئے کی گئی کاوشوں کو سراہا۔چیئرمین نیب جسٹس جاوید اقبال نے کہا کہ ملک بھر سے بدعنوانی کا خاتمہ نیب کی اولین ترجیح ہے۔

یہ بھی پڑھیں: وزیر خارجہ شاہ محمود قریشی کی کینیا کے چیف سیکریٹری تجارت سے ملاقات

چیئرمین نیب نےکہا کہ عوام کی بدعنوانی سے متعلق شکایات کے ازالہ کیلئے نہ صر ف اپنے دروازے کھول دیئے ہیں وہاں نیب کے افسران اوراہلکاران ملک سے بدعنوانی کے خاتمہ کیلئے اپنے فرائض قومی فریضہ سمجھتے ہوئے ادا کر رہے ہیں تاہم بہتر سے بہتری کے لئے ہمیشہ کوشاں رہنا نیب کے ایمان اور یقین کا حصہ ہے۔

چیئرمین نیب جسٹس جاوید اقبال نے نیب کے تمام ڈی جیزکو ہدایت کی کہ وہ کرپشن فری پاکستان کیلئے اپنی تمام تر توانائیاں صرف کرتے ہوئے شکایات کی جانچ پڑتال، انکوائریاں اور انوسٹی گیشنز ٹھوس شواہد اور قانون کے تمام تقاضوں کومد نظر رکھتے ہوئے مکمل کریں تاکہ بدعنوان عناصر کو قانون کے مطابق انصاف کے کٹہرے میں کھڑا کیا جا سکے جہاں قانون اپنا راستہ خود بنائے گا۔