گوگل نیوز پر ہمیں فالو کریںلبنان کے بعد غزہ میں جنگ بندی کیلئے ایک بار پھر کوششوں کا آغاز ہوگیا ہے، اس سلسلے میں حماس وفد خلیل الحیہ کی سربراہی میں مصری دارالحکومت قاہرہ پہنچ گیا ہے۔
ایجنسی فرانس پریس نے تحریک حماس کے ایک رہنما کے حوالے سے بتایا ہے کہ تحریک کے سیاسی بیورو کے رکن خلیل الحیہ کی سربراہی میں حماس کا وفد ہفتے کی سہ پہر قاہرہ پہنچ گیا ہے تاکہ جنگ بندی اور قیدیوں کے تبادلے کے بارے میں نئے خیالات سے متعلق بات چیت کی جا سکے۔
حماس کے سیاسی بیورو کے رکن رہنما نے کہا کہ اس دورے کا مقصد ایک دوسرے تک رسائی حاصل کرنا اور جنگ روکنے کا معاہدہ اور قیدیوں کے تبادلے کے معاہدے پر بات چیت کرنا ہے۔
رہنما نے مزید بتایا کہ وفد مصری جنرل انٹیلی جنس سروس کے سربراہ میجر جنرل حسن رشاد اور اسرائیل کے ساتھ ثالثی فائل کے حکام کے ساتھ کئی ملاقاتیں کرے گا تاکہ جنگ کو روکنے کے بارے میں نئی تجویز تیار کرنے کے لیے نئے خیالات کے ایک سیٹ پر تبادلہ خیال کیا جا سکے۔
انہوں نے زور دے کر کہا کہ حماس ان تمام خیالات اور تجاویز پر بات چیت کے لیے تیار ہے جو جنگ کو روکنے، غزہ کی پٹی سے اسرائیلی انخلا، بے گھر افراد کی واپسی، انسانی ہمدردی اور امداد کی فراہمی اور قیدیوں کے تبادلے کے سنجیدہ معاہدے پر منتج ہوں۔
انہوں نے زور دے کر کہا کہ حماس کو ابھی تک کوئی نئی پیشکش یا تجویز موصول نہیں ہوئی ہے لیکن تحریک جنگ بندی کے معاہدے اور غزہ کی پٹی سے بتدریج انخلا کا مطالعہ کرنے کے لیے تیار ہے۔ بشرطیکہ ایسی بین الاقوامی ضمانتیں ہوں جو جنگ کے حتمی خاتمے کا باعث بنیں۔
وائٹ ہاؤس نے بدھ کو اعلان کیا تھا کہ امریکہ مصر، قطر اور ترکیہ کی مدد سے جنگ بندی تک پہنچنے اور غزہ کی پٹی میں قیدیوں کی رہائی کے لیے نئی سفارتی کوششیں کر رہا ہے۔
