گوگل نیوز پر ہمیں فالو کریںصوبہ بلوچستان کے شہر چمن میں دھماکے کے نتیجے میں 5 افراد جاں بحق جبکہ 14 افراد زخمی ہو گئے ہیں، دھماکے کی آواز اتنی زوردار تھی کہ اس سے قریبی عمارتوں کے شیشے ٹوٹ گئے۔
تفصیلات کے مطابق مال روڈ پر ہونے والے دھماکے کی اطلاع ملتے ہی پولیس اور قانون نافذ کرنے والے اداروں کے ساتھ ساتھ ریسکیو ٹیمیں بھی جائے وقوعہ پر پہنچ گئی ہیں۔
دھماکے کے بعد پولیس اور لیویز فورس نے متاثرہ علاقے کو گھیرے میں لے لیا اور دہشت گردوں کو تلاش کرنے کیلئے سرچ آپریشن شروع کردیا گیا ہے۔
مقامی پولیس کے مطابق دھماکہ آج صبح 11 بجے کے بعد ہوا۔ دھماکے میں زخمی ہونے والے افراد اور میتوں کو قریبی ہسپتال منتقل کردیا گیا جبکہ ہسپتال میں پہنچائے گئے زخمیوں کو طبی امداد دی جارہی ہے۔
سیکورٹی اداروں نے دھماکے کے فوراً بعد مال روڈ اور اردگرد کا علاقہ سیل کردیا ہے اور واقعے پر تفتیش جاری ہے۔ پولیس کا کہنا ہے کہ دھماکہ موٹر سائیکل میں نصب ریموٹ کنٹرول بم کے ذریعے کیا گیا۔
یہ بھی پڑھیں: گھوٹکی میں دھماکہ، 2 رینجرز اہلکار اور ایک شہری جاں بحق
