بائنانس ایکس چینج، کرپٹو کرنسی میں اربوں روپے کا فراڈ، ہزاروں پاکستانی لٹ گئے

کراچی: کرپٹو کرنسی میں 18 ارب سے زائد کا فراڈ، ہزاروں پاکستانی لٹ گئے، ایف آئی اے نے عالمی کرپٹو ایکسچینج کو نوٹس جاری کردیا۔

پاکستانیوں سے اربوں روپے کا فراڈ آن لائن ایپلی کیشنز کے ذریعے کیا گیا،آن لائن ایپلی کیشنز کرپٹو کرنسی کی عالمی ایکسچینج بائنانس سے جڑی تھیں،ایف آئی اے سائبر کرائم نے بائنانس کے پاکستان میں جنرل منیجرکو نوٹس جاری کردیاہے۔

ایف آئی اے نے امریکا اور کے مین آئی لینڈ میں بائنانس کے ہیڈکوارٹر بھی نوٹس بھیجے ہیں ،ممکنہ طور پر کرپٹو کرنسی سے ٹیررفنانسنگ اور منی لانڈرنگ بھی ہورہی تھی۔

پاکستان میں 11 موبائل فون ایپلی کیشنز بائنانس سے رجسٹرڈ تھیں جن کے ذریعے فراڈ ہوا، 11 موبائل فون ایپلی کیشنز دسمبر میں اچانک بند ہوگئیں جن پر ہزاروں پاکستانی رجسٹرڈ تھے،ان ہزاروں پاکستانیوں نے ان ایپلی کیشنز پر اربوں روپے لگا رکھے تھے۔

مزید پڑھیں:وقار ذکاء کا کرپٹو ایکس چینج کا منصوبہ،کیا پاکستان میں بٹ کوئن کا کوئی مستقبل ہوسکتا ہے ؟

ایپلی کیشنز کے ذریعے ابتدا میں ورچول کرنسیوں میں کاروبار کی سہولت دی جاتی تھی،بٹ کوائن، ایتھرام، ڈوج کوائن وغیرہ میں سرمایہ کاری بائنانس کے ذریعے ظاہر کی جاتی تھی،ایپلی کیشنز کے ٹیلیگرام اکاونٹ پر ماہرین کرپٹو کرنسی پر جوا بھی کھلاتے تھے۔

ایک ایپلی کیشن پر 5 سے 30 ہزار کسٹمر اور سرمایہ کاری 100 سے 80 ہزار ڈالر تھی،ایپلی کیشنز کے ذریعے عوام کو مزید افراد کو لانے پر بھاری منافع کا لالچ دیا جاتا تھا،ایف آئی اے کو بائنانس کے 26 مشتبہ بلاک چین والٹ ملے ہیں جن پر رقوم ٹرانسفر ہوئیں۔

بائنانس سے ان بلاک چین والٹس کی تفصیلات مانگی ہیں،ایف آئی اے پاکستان سے بائنانس کے ذریعے ہونے والی ٹرانزیکشن کی چھان بین کررہی ہے،بائنانس ٹیرر فائنانسنگ اور منی لانڈرنگ کے لیے آسان راستہ ہے،امید ہے بائنانس ان مالی جرائم کی تحقیقات میں پاکستان سے تعاون کرے گا۔